Porsche жарты жылда автокөлік сатылымын 16%-ға қысқартты
Компанияның негізгі нарықтарындағы сатылым төмендегенімен, Porsche 911 моделіне сұраныс 19%-ға артты
Германиялық спорттық автокөлік өндірушісі Porsche 2026 жылдың алғашқы жартыжылдығында сатылым көлемін өткен жылдың сәйкес кезеңімен салыстырғанда 16%-ға азайтып, 122,306 мың автокөлік сатты, деп хабарлайды Интерфакс-Қазақстан.
Компанияның мәліметінше, сатылымның төмендеуіне бірнеше фактор әсер еткен. Атап айтқанда, іштен жанатын қозғалтқышпен жабдықталған 718 моделінің өндірісінің тоқтатылуы, 2025 жылдың бірінші жартыжылдығында толық электрлі Macan моделінің жеткізілімі қарқынды өскені және АҚШ-та электрлі көліктер мен гибридтерге арналған салықтық жеңілдіктердің жойылуы.
Қаңтар-маусым аралығында Германиядағы сатылым 6%-ға төмендеп, 14,94 мың автокөлікті құрады. Солтүстік Америкада көрсеткіш 13%-ға азайып, 37,71 мың көлікке жетті. Қытайда сатылым 32%-ға төмендеп, 14,5 мың автокөлікті құрады. Германияны есептемегендегі Еуропада 14%-ға азайып, 30,28 мың көлік сатылса, өзге нарықтарда көрсеткіш 18%-ға төмендеп, 24,88 мың автокөлік болды.
Компанияның ең көп сатылған моделі Cayenne болып қалды. Есепті кезеңде осы модельдің 38,14 мың данасы жеткізілді, бұл өткен жылмен салыстырғанда 9%-ға аз. Автоөндірушінің хабарлауынша, маусым айының соңында тұтынушылар Cayenne моделінің алғашқы электрлі нұсқаларын ала бастады.
Сонымен қатар Porsche 911 моделінің жеткізілімі 19%-ға өсіп, 30,53 мың автокөліктен асты.
Компания күзде Инвесторлар күні аясында 2035 жылға дейінгі даму стратегиясын таныстыруды жоспарлап отыр.
Бейсенбі күнгі сауда барысында Porsche-ның артықшылықты акциялары 1,7%-ға арзандады. Соған қарамастан соңғы үш айда Volkswagen Group құрамына кіретін компанияның нарықтық капитализациясы 12,6%-ға өсіп, 41,8 млрд еуроға жетті. Осы кезеңде DAX қор индексі 4,7%-ға көтерілді.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
