Танымал LEGO бренді Қазақстандағы алғашқы ресми дүкенін ашады
LEGO Store халықаралық форматта жұмыс істемек
Алматының сауда-ойын-сауық инфрақұрылымы әлемдік деңгейдегі жаңа нысанмен толығады. 4 шілде күні сағат 11:00-де MEGA Alma-Ata сауда-ойын-сауық орталығында Қазақстандағы алғашқы ресми LEGO Store дүкенінің ашылуы өтеді, деп хабарлайды Kapital.kz іскерлік ақпарат орталығы қала әкімдігінің баспасөз қызметіне сілтеме жасап.
Қалалық туризм басқармасының мәліметінше, дүкен халықаралық желі форматында жұмыс істеп, келушілерге эксклюзивті топтамаларды, фирмалық сервистерді және интерактивті аймақтарды қамтитын кең ассортименттегі өнімдерді ұсынады.
«Алғашқы ресми LEGO Store дүкенінің ашылуы Қазақстан үшін маңызды оқиға әрі Алматының жетекші халықаралық брендтер үшін тартымды қала екенін тағы бір мәрте дәлелдейді. Жаңа нысан қаланың туристік және сауда-ойын-сауық инфрақұрылымын толықтырып, Алматы тұрғындары мен қонақтарының отбасылық демалыс мүмкіндіктерін кеңейтеді», – делінген хабарламада.
LEGO Group – дамытушы ойыншықтар мен білім беру бағытындағы ойын шешімдерін өндіретін әлемдегі ең ірі компаниялардың бірі. Бренд өнімдері әлемнің 130-дан астам елінде ұсынылған және балалар мен ересектер арасында кең танымал.
Сондай-ақ Алматыда Almaty Water Garden көпфункционалды кешені салынады. Демалыс, мәдениет және ойын-сауық орталығы Алатау ауданында, Момышұлы мен Саин көшелерінің аралығында 27 гектардан астам аумақты қамтиды. Жобаны іске асыру 2026–2027 жылдарға жоспарланған.
Бұған дейін Алматының ел бойынша қонақүйлердің жүктелуі жөнінен бірінші орында тұрғаны хабарланған болатын. Оңтүстік астанаға келетін туристердің басым бөлігі Ресей, Қытай және Үндістан азаматтары.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
