Үкімет әлеуметтік төлемдерді оңтайландырып, 860 млрд теңгені қайта бөледі
Базалық төлемдер сақталады, алайда 2027 жылдан бастап оларды тағайындау талаптары өзгереді
Үкімет базалық әлеуметтік төлемдерді алып тастауды жоспарлап отырған жоқ. Алайда 2027 жылдан бастап оларды тағайындау тетіктерінің бір бөлігі қайта қаралады. Өзгерістер ең алдымен табысы жоғары азаматтарға қатысты болады, ал үнемделген қаражат әлеуметтік маңызы бар өзге салаларды қаржыландыруға бағытталады, деп хабарлайды Kapital.kz іскерлік ақпарат орталығы.
Премьер-министрдің орынбасары – ұлттық экономика министрі Серік Жұманғариннің айтуынша, мемлекет халықты әлеуметтік қолдау жүйесінен бас тартпайды, бірақ оны неғұрлым атаулы етуді көздеп отыр. Оның сөзінше, бүгінде әлеуметтік сала мемлекеттік шығыстардың ең ірі бағыты болып қала береді.
«Егер республикалық және жергілікті бюджеттерді қоса алғанда, мемлекеттік бюджеттің жалпы көлемін алсақ, барлық шығыстың 50,2%-ы әлеуметтік салаға тиесілі. Бұл өте ауқымды қаражат», – деді Серік Жұманғарин парламент кулуарында.
Министрдің айтуынша, осыған байланысты үкімет әлеуметтік төлемдер жүйесін оңтайландыруға кірісіп отыр. Негізгі мақсат – мемлекеттік көмекті ең алдымен оған шын мәнінде мұқтаж азаматтарға бағыттау.
«Әлеуметтік төлемдерді тоқтату туралы сөз болып отырған жоқ. Біз оларды оңтайландыру туралы айтып отырмыз», – деді министр.
Серік Жұманғариннің мәліметінше, келесі жылдан бастап бюджетте әлеуметтік төлемдерге бөлінетін кемінде 860 млрд теңгені оңтайландыру жоспарланып отыр. Бұл қаражат әлеуметтік салада қалады және білім беру, ғылым, денсаулық сақтау, спорт, туризм мен мәдениетті қаржыландыруға қайта бөлінеді.
Министр базалық төлемдердің сақталатынын, алайда мемлекеттік қолдаудың жекелеген түрлерін алу шарттары қайта қаралатынын нақтылады. Ең алдымен өзгерістер табыс деңгейі жоғары А және B санатындағы азаматтарға қатысты болады.
«Бұл – жақсы қамтамасыз етілген азаматтар. Сондықтан оларға қойылатын талаптар күшейтіледі», – деді Серік Жұманғарин.
Еске салайық, 2026 жылы атаулы әлеуметтік көмек (ӘАК) төлеуге бюджеттен 62,7 млрд теңге қарастырылған. Қаңтар айында бұл көмекке 2,3 млрд теңге тағайындалды. Бұған дейін Қазақстанда атаулы әлеуметтік көмекті жасанды интеллект көмегімен тағайындау технологиясын енгізу жоспарланып отырғаны хабарланған болатын. Сонымен қатар әлеуметтік қолдау шараларын тағайындау кезінде отбасының әл-ауқатын бағалайтын скорингтік модель пилоттық режимде іске қосылды.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
