Ақтауда фармацевтикалық логистикалық хаб салынады
СК-Фармацияның бірыңғай дистрибьюторының заманауи кешені еліміздің бірнеше қаласында кезең-кезеңімен іске қосылады
Ақтауда бірыңғай дистрибьютордың заманауи фармацевтикалық логистикалық кешені салынады. Жобаны Маңғыстау облысының әкімі Нұрдәулет Қилыбай мен «СК-Фармация» басшысы Нұрлыбек Асылбеков талқылады. Жаңа қойма өңірдегі 60 медициналық ұйым үшін өмірлік маңызы бар дәрі-дәрмектердің резервін қалыптастыруға мүмкіндік беріп, облыста 100-ге дейін жұмыс орнын ашуға жол ашады, деп хабарлайды Kapital.kz іскерлік ақпарат орталығы әкімдіктің баспасөз қызметіне сілтеме жасап.
Нұрлыбек Асылбековтың айтуынша, нысан құрылысы Қазақстан Республикасының 2024-2030 жылдарға арналған денсаулық сақтау инфрақұрылымын дамыту тұжырымдамасы аясында жүзеге асырылуда. Бірыңғай дистрибьютордың заманауи логистикалық кешендері кезең-кезеңімен Астана, Алматы, Шымкент, Ақтау, Ақтөбе және Қарағанды қалаларында салынатын болады.
Жоба халықаралық талаптарға сай, дәрі-дәрмек пен медициналық бұйымдарды сақтауға арналған 1–5 мың шаршы метрлік заманауи фармацевтикалық қойма салуды көздейді. Бұл бастама стратегиялық дәрі қорының қалыптасуына, медициналық ұйымдар мен халықты үздіксіз дәрі-дәрмекпен қамтамасыз етуге мүмкіндік береді.
Маңғыстау облысының әкімі Нұрдәулет Қилыбай жобаның өңір үшін маңызын атап өтті.
«Ақтауда стратегиялық фармацевтикалық логистикалық кешеннің салынуы Маңғыстау облысы ғана емес, бүкіл батыс өңірдің дәрі-дәрмек қауіпсіздігін күшейтуге зор үлес қосады. Жоба өмірлік маңызды препараттардың қорын қалыптастыруға, дәрі-дәрмекпен қамтамасыз ету жүйесінің тұрақтылығын арттыруға, логистикалық инфрақұрылымды нығайтуға және жаңа жұмыс орындарын ашуға мүмкіндік береді. Өз тарапымыздан жобаны заңнама аясында толық қолдауға дайынбыз», – деді ол.
Тараптар жер телімін анықтау, инженерлік инфрақұрылымды дамыту және жобаны іске асырудың келесі кезеңдерін келісу бойынша бірлескен жұмысты жалғастыруға уағдаласты.
«СК-Фармация» арқылы Маңғыстау облысындағы 60 медициналық ұйым дәрі-дәрмекпен және медициналық бұйымдармен қамтамасыз етіледі, олардың ішінде 31 мемлекеттік және 29 жекеменшік мекеме бар.
Бұған дейін премьер-министр Олжас Бектенов денсаулық сақтау министрлігі мен бірқатар фармацевтикалық компаниялар арасында инвестициялық келісімдер жасау туралы қаулыға қол қойған болатын. Жалпы инвестиция көлемі 173 млрд теңгені құрайды. Сондай-ақ Семейде қытайлық серіктестердің қатысуымен фармацевтикалық зауыт салу жоспарланып отыр.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
