• Басты бет
• Экономика
• Қырғызстандағы қазақстандық санаторий-курорттық кешендердің жөндеу жұмыстары қалай жүріп жатыр

Қырғызстандағы қазақстандық санаторий-курорттық кешендердің жөндеу жұмыстары қалай жүріп жатыр

«Қазақстан» санаториін жаңғырту жұмыстары жыл соңына дейін аяқталуы жоспарланған

Қырғызстанда орналасқан «Қазақстан» санаторийін жаңғырту аясындағы құрылыс жұмыстары биылғы жылдың IV тоқсанына дейін аяқталуы жоспарланып отыр. Бұл туралы Қазақстанның төрт санаторий-курорттық нысанының құрылыс алаңдарын аралаған Қаржы министрі Мәди Тәкиевтің сапары барысында белгілі болды, деп хабарлайды Kapital.kz іскерлік ақпарат орталығы.

Министр нысандардың қазіргі жағдайымен, инфрақұрылымының дамуымен және инвестициялық жобалардың жүзеге асу барысымен танысты.

Ведомство мәліметінше, «Қазақстан» санаторийінің құрылысына ерекше назар аударылған. Құрылыс-монтаж жұмыстары бекітілген кестеге сәйкес жүргізіліп жатыр, ал жобаны толық аяқтау биылғы жылдың IV тоқсанына жоспарланған.

«Жобаны іске асыру заманауи талаптарға сай демалыс және сауықтыру қызметтерін ұсынатын қазіргі үлгідегі санаторий-курорттық кешен құруға мүмкіндік береді», – делінген хабарламада.

Қалған үш нысан бойынша құрылыс және жаңғырту жұмыстарын қамтитын жобалық құжаттама әзірленіп жатыр. Бұл жобалар азаматтарға қолайлы демалыс жағдайын жасап, Ыстықкөл жағалауындағы қазақстандық рекреациялық нысандардың туристік тартымдылығын арттыруға ықпал етеді деп күтілуде.

Сапар қорытындысы бойынша Қаржы министрі жобаларды уақытылы жүзеге асыру, мемлекеттік активтерді тиімді пайдалану және белгіленген мерзімдерді сақтау бойынша бірқатар тапсырма берді.

Айта кетейік, бұған дейін Қазақстан Ыстықкөлдегі курорттық нысандарды 2029 жылға дейін жаңғыртуды жалғастыратыны хабарланған болатын. Төрт жоба бойынша ықтимал инвестиция көлемі 26,7 млрд теңгеге бағаланып отыр.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Kapital.kz-ті оқыңыз