Алматыдағы Республика алаңы қалай өзгерді
Қаланың басты қоғамдық кеңістігі британдық дизайнмен жаңартылып, жаңа субұрқақтар мен мыңдаған жасыл желек отырғызылды
Алматыдағы Республика алаңын абаттандыру жұмыстары Лондондағы LDA Design бюросының жобасы бойынша толық аяқталды. Мұнда инженерлік коммуникациялар толық жаңартылып, жасыл желек отырғызылды, амфитеатрлар, веложолдар мен сәндік су айдындары салынды. «Қасбеттен қасбетке дейін» қағидаты бойынша жүргізілген ауқымды жаңғырту жұмыстарының нәтижесімен қала әкімі Дархан Сатыбалды танысты, деп хабарлайды Kapital.kz іскерлік ақпарат орталығы қала әкімдігінің баспасөз қызметіне сілтеме жасап.
Жобаның негізгі мақсаты – жаяу жүргіншілерге басымдық берілетін заманауи, қауіпсіз әрі жайлы қалалық орта қалыптастыру. Республика алаңындағы абаттандырылған аумақтың жалпы көлемі 4,5 гектарды құрайды.
Республика алаңында қоғамдық кеңістіктердің жабындары толық ауыстырылып, инженерлік желілер, сыртқы жарықтандыру және автоматты суару жүйесі жаңғыртылды. Абаттандыру кезінде пайдалану мерзімі 10 жылдан асатын заманауи әрі төзімді материалдар қолданылған. Бұл алдағы уақытта аумақты күтіп-ұстауға кететін шығындарды едәуір азайтуға мүмкіндік береді.
Жоба аясында ауқымды көгалдандыру жұмыстары жүргізілді. Атап айтқанда, 233 ірі ағаш, 63 мыңнан астам бұта және 17,7 мың көпжылдық өсімдік отырғызылып, көгалдар мен беде жамылғысы бар учаскелер жасақталды. Кешкі уақытта жасыл желек сәндік архитектуралық жарықпен безендіріледі. Сонымен қатар аумақта 129 заманауи жарық шамы орнатылды.
Алаңда балалар ойын алаңдары, серуендеу жолдары, демалыс аймақтары және екі амфитеатр салынды. Сондай-ақ Сәтбаев көшесі бойымен қалыптасатын бірыңғай велосипед бағытының бір бөлігі болатын веложолдар төселді. Бұдан бөлек, орындықтар, қоқыс жәшіктері, велосипед тұрақтары, үстелдер, креслолар, ландшафтық жиһаздар, аркалар және басқа да шағын сәулет нысандарын қоса алғанда, 500-ден астам қала жиһазы мен абаттандыру элементі орнатылды.
Жаңартылған алаңның басты ерекшеліктерінің бірі – қоғамдық кеңістіктің жаңа ландшафтық келбетін қалыптастыратын сегіз сәндік су айдыны. Сонымен қатар бұрыннан бар субұрқақтар толық қалпына келтіріліп, жаңа заманауи субұрқақ кешендері салынды.
Сәтбаев көшесінде жаңа қоғамдық көлік аялдамасы пайдалануға берілді. Сонымен бірге қосымша бағдаршамдар орнатылып, реттелетін жаяу жүргіншілер өткелдері ұйымдастырылды және барлық санаттағы азаматтарға қолайлы кедергісіз орта қалыптастырылды.
Еске салайық, бұған дейін Алматы әкімдігі Орталық мәдениет және демалыс саябағындағы жер учаскелерін жалға беру шарттарын ұзартудан бас тартқан болатын. Бұған жалға алушы – «ТФК «Алтын-Тараз» ЖШС-нің саябақты абаттандыру мен инфрақұрылымды дамытуға инвестиция салмағаны себеп болды. Қала әкімдігі саябақты көгалдандыруды, заманауи демалыс аймақтарын, туристік және мәдени инфрақұрылымды дамытуды көздейтін жаңғырту тұжырымдамасын әзірлемек. Сонымен қатар Алматыда жалпы аумағы 27 гектардан асатын Almaty Water Garden көпфункционалды демалыс, мәдениет және ойын-сауық кешені салынады.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
