Атырау мұнай өңдеу зауыты жөндеуден кейін жұмысын мерзімінен бұрын бастады
Жоспарлы жөндеу жұмыстарына 1700-ге жуық маман жұмылдырылды
Атырау мұнай өңдеу зауыты (АМӨЗ) жоспарлы алдын алу жөндеу жұмыстарын мерзімінен бұрын аяқтап, 8 шілдеден бастап алғашқы мұнайды қабылдауға кірісті. Технологиялық қондырғыларды кезең-кезеңімен іске қосу Энергетика министрлігі бекіткен кестеден 1,5 тәулік бұрын жүзеге асырылып жатыр. Бұл туралы «ҚазМұнайГаз» ҰК» АҚ басқарма төрағасы Асхат Хасеновтің кәсіпорынға жұмыс сапары барысында белгілі болды, деп хабарлайды Kapital.kz іскерлік ақпарат орталығы компанияның баспасөз қызметіне сілтеме жасап.
АМӨЗ бас директоры Қуаныш Бишімов жоспарлы жөндеу кезінде 20 реакторға, 213 резервуарға, 32 колоннаға және 231 жылу алмастырғыш жабдыққа міндетті техникалық куәландыру жүргізілгенін айтты. Сонымен қатар құбырлардың жекелеген учаскелері ауыстырылып, бірқатар технологиялық қондырғыларда жалпы көлемі 335 тоннадан асатын катализаторлар жаңартылды. Ашық түсті мұнай өнімдері – автомобиль бензині, дизель және авиациялық отын өндірісін арттыру мақсатында ЭЛОУ-АВТ-3 қондырғысындағы вакуумдық колоннаның ішкі құрылғылары алмастырылды. Жөндеу жұмыстарына шамамен 1700 маман мен 50-ден астам арнайы техника тартылды.
Жылдың алғашқы алты айында зауыт 2,8 млн тоннадан астам шикі мұнай өңдеп, жоспарды 20 мың тоннаға асыра орындады. Тауарлық өнім өндірісі 2,6 млн тоннаны құрап, жоспардан шамамен 22 мың тоннаға жоғары болды.
Негізгі өнім түрлері бойынша да өндірістік жоспарлар артығымен орындалды:
• автомобиль бензинін өндіру көлемі жоспарланған 983,5 мың тоннаның орнына 1 млн тоннадан асты;
• дизель отынының өндірісі 1 млн тоннадан асып, жоспардан 120 мың тоннаға жоғары болды;
• авиациялық отын өндірісі 120,3 мың тоннаға жетіп, жоспардан шамамен 14 мың тоннаға артты;
• сұйытылған мұнай газының өндірісі 115 мың тоннаны құрап, жоспардан 9 мың тоннаға көп болды.
Есепті кезеңде мұнай өңдеу тереңдігі 91%-ға жетсе, өндірілген өнімнің жалпы көлеміндегі ашық түсті мұнай өнімдерінің үлесі 81%-ды құрады.
Қазір кәсіпорынның негізгі міндеттері – сыртқы электрмен жабдықтау жүйесін жаңғырту, резервтік электрмен қоректендіру көзін іске қосу және жөндеуаралық кезеңді ұзарту.
Еске салайық, Атырау мұнай өңдеу зауытында жоспарлы алдын алу жөндеу жұмыстары 2026 жылғы 26 маусымда басталған болатын.
Бұған дейін премьер-министр Олжас Бектенов шекарадағы бақылауды күшейтіп, жанармай тапшылығына жол бермеу үшін барлық қажетті шараларды қабылдауды тапсырған еді.
Энергетика министрі Ерлан Ақкенженов Қазақстанның Ресейге бензин жеткізу мәселесі бойынша келіссөз жүргізіп жатқаны туралы ақпаратты жоққа шығарды. Сонымен қатар Энергетика министрлігі Қырғызстанның бензин жеткізу жөніндегі сұранысын қарастырып жатыр. Ал Ұлттық банк төрағасы Тимур Сүлейменов Ресейдегі жанармай нарығындағы жағдай бақылауда екенін, бірақ оның Қазақстан экономикасына ықпалы туралы нақты болжам жасауға әлі ерте екенін мәлімдеген болатын.
Айта кетейік, Қазақстанда АИ-92 маркалы бензин мен дизель отыны бағасын көтеруге енгізілген мораторий 2025 жылғы қазанда күшіне еніп, 2026 жылғы 1 сәуірде аяқталды.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
