ЕҚДБ Solidcore Resources компаниясына 300 млн доллар қаржы бөледі
Бұл қаражатқа Павлодар облысында құрамында алтыны бар қиын өңделетін концентратты қайта өңдеу зауыты салынады
Еуропалық қайта құру және даму банкі (ЕҚДБ) Solidcore Resources компаниясына 300 млн доллар көлемінде несие береді. Қаражат Орталық Азиядағы құрамында алтыны бар қиын өңделетін концентратты қайта өңдейтін алғашқы зауытты іске қосуға бағытталады, деп хабарлайды Kapital.kz іскерлік ақпарат орталығы банктің баспасөз қызметіне сілтеме жасап.
«ЕҚДБ Павлодар облысында қысыммен тотықтыру технологиясы қолданылатын «Ертіс» гидрометаллургиялық кешенін салу үшін SR компаниясы мен оның толық еншілес кәсіпорны болып табылатын «Ертіс гидрометаллургиялық комбинатына» (ЕГМК) 300 млн долларға дейін (263 млн еуро) несие береді.
Кешен жылына 278,5 мың тоннаға дейін алтын концентратын өңдей алады және SR компаниясының шетелдік қайта өңдеу қуаттарына тәуелділігін азайтады», – делінген хабарламада.
Жобаға ЕҚДБ-дан бөлек Abu Dhabi Commercial Bank, ING Bank және Société Générale банктерінен құралған синдикат та қатысып, тағы 300 млн доллар көлемінде қаржы бөлді.
Solidcore Resources компаниясының мәліметінше, бұған дейін KfW IPEX-Bank банкімен жеті жыл мерзімге 100 млн долларға дейінгі кредиттік желі ашу жөнінде алдын ала келісім жасалған. Қазіргі уақытта тараптар несие құжаттарын рәсімдеу және қажетті ішкі келісімдерді алу жұмыстарын жалғастырып жатыр.
Жалпы жобаны іске асыруға кететін күрделі шығын шамамен 1 млрд долларды құрайды. Ол компанияның операциялық ақша ағыны мен тартылған қарыз қаражаты есебінен қаржыландырылады.
«Ертіс гидрометаллургиялық комбинаты» құрамында алтыны бар қиын өңделетін концентраттарды қайта өңдейді.
«Жоба аяқталғаннан кейін Қазақстанда жаңа металлургиялық сегмент қалыптасады. Бұл елдің тау-кен өнеркәсібінде қосылған құны жоғары өнім көлемін арттыруға мүмкіндік береді. Қазіргі таңда бұл сала жалпы ішкі өнімнің 12%-ын және шикізат экспортының шамамен үштен бірін қамтамасыз етеді», – деп атап өтті ЕҚДБ.
Жоба аясында SR гидрометаллургия саласындағы ресурсты тиімді пайдаланатын, экологиялық тұрғыдан қауіпсіз әрі сенімді технологиялардың бірі саналатын қысыммен тотықтыру әдісін енгізеді. Компания бұған дейін осындай технологияны ұқсас жобаларда қолданған. Бұл Қазақстандағы алтын қорының шамамен жартысын құрайтын қиын балқитын кен орындарын игеруге қажетті инфрақұрылымды дамытуға мүмкіндік береді.
Жобаға Жасыл климат қоры мен ЕҚДБ техникалық қолдау көрсетеді. Бұл қаржы компанияға климаттық корпоративтік басқаруды жетілдіруге және экологиялық, әлеуметтік әрі басқарушылық (ESG) есептілік тәжірибесін жергілікті талаптардан жоғары деңгейде дамытуға мүмкіндік береді.
Бүгінге дейін ЕҚДБ Қазақстанда жалпы құны 12,8 млрд долларға (11 млрд еуро) жуық 354 жобаны қаржыландырды. Қазақстан Орталық Азиядағы ЕҚДБ инвестицияларын ең көп тартқан әрі ең ұзақ уақыт бойы серіктес болып келе жатқан мемлекет саналады.
Бұған дейін 2026 жылы ЕҚДБ Қазақстанға инвестиция көлемін 1,3 млрд еуроға дейін арттыруды жоспарлап отырғаны хабарланған болатын.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
