Түркістан облысында қытайлық инвесторлар құрылыс хабын салуды жоспарлап отыр
Өңір билігі компанияларға қажетті инфрақұрылымы бар өндірістік алаңдарды ұсынуға дайын
Түркістан облысында қытайлық құрылыс материалдары мен сантехникалық бұйымдар өндірісін іске қосу жоспарланып отыр. Облыс әкімі Нұралхан Көшеров Jiangxi Zhixin Real Estate Development Co., Ltd компаниясының бас директоры Мао Тиньмен және «Хуатун» халықаралық инвестициялық-өнеркәсіптік тобының халықаралық бизнес және шетелдік өнеркәсіптік инвестициялар жөніндегі жетекшісі Пэн Бохэнмен кездесті. Тараптар жобаларды жан-жақты зерделеуге уағдаласты, деп хабарлайды Kapital.kz іскерлік ақпарат орталығы облыс әкімдігінің баспасөз қызметіне сілтеме жасап.
«Түркістан облысында өндірісті дамытуға ерекше көңіл бөлінеді. Біз шикізатты экспорттауға емес, оны терең өңдеуге және қосылған құны жоғары өнім шығаратын жобаларды жүзеге асыруға басымдық береміз. Сондықтан құрылыс индустриясын дамытуға бағытталған бастамалардың біз үшін маңызы зор. Инвесторларға жан-жақты қолдау көрсетуге дайынбыз. Жобаларыңызды жүзеге асыру үшін дайын индустриялық парктер мен өндірістік ғимараттарымыз бар. Қажетті инфрақұрылым тартылған. Басты басымдығымыз – шикізатты терең өңдеу, дайын өнім шығару және жаңа жұмыс орындарын ашу», – деді Нұралхан Көшеров.
Қытайлық инвесторлар Түркістан облысында құрылыс хабын құруға қызығушылық танытып, құрылыс материалдары мен сантехникалық өнімдер шығаратын заманауи өндіріс орындарын ашу жоспарын таныстырды.
Еске салайық, Түркістан облысындағы Қасқасу тауларында әлемдік деңгейдегі экологиялық тау-курорт қалашығын салу жоспарланып отыр. Өңірде ауыл шаруашылығына арналған ұшқышсыз ұшу аппараттарын құрастыратын зауыт жұмысын бастады. Сондай-ақ ауыл шаруашылығы техникасын, трансформатор бөлшектерін және мақта майын өндіру көзделген.
Бұған қоса, Түркістан облысында Орталық Азиядағы жауын-шашынды жасанды көбейтуге бағытталған алғашқы жобаға ресми түрде старт берілді.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
