• Басты бет
• Экономика
• Өңірлерде қалдықтарды энергетикалық кәдеге жарату зауыттарын салу қажет – Экология министрлігі

Өңірлерде қалдықтарды энергетикалық кәдеге жарату зауыттарын салу қажет – Экология министрлігі

Қазақстан инвесторларды іздеп жатыр

Қазақстанның экология және табиғи ресурстар министрлігі өңірлерде қалдықтарды энергетикалық кәдеге жарату зауыттарын салу жобалары бойынша инвесторлармен өзара тиімді ынтымақтастыққа дайын екенін мәлімдеді. Бұл туралы Kapital.kz іскерлік ақпарат орталығы ведомствоның баспасөз қызметіне сілтеме жасап хабарлады.

Экология министрлігі 2025 жылы Астана, Алматы және Шымкент қалаларында қалдықтарды энергиялық кәдеге жарату зауыттарын (электр энергиясын өндіре отырып қалдықтарды термиялық өңдеу) салу жөнінде инвестициялық келісімдер жасалғанын еске салды. Тікелей келіссөздер аясында аталған жобалар үшін электр энергиясына 1 кВт·сағат үшін 55 теңге көлемінде тариф белгіленді. Бұл тетік қалдықтарды кәдеге жарату мен қайта өңдеу үлесін арттыруға, оларды полигондарға көму көлемін қысқартуға, қалдықтарды басқару саласының инвестициялық тартымдылығын күшейтуге, сондай-ақ қоршаған ортаға келетін кері әсерді азайтуға бағытталған.

Бүгінде қалдықтарды энергияға айналдыру жобалары Еуропаның көптеген елдерінде, сондай-ақ Оңтүстік Кореяда, Қытай Халық Республикасында, Жапонияда және басқа да мемлекеттерде табысты іске асырылып келеді. Бұл жобалар аталған елдерде қалдықтарды басқарудың заманауи жүйесінің маңызды бөлігіне айналған.

Министрліктің мәліметінше, елімізде жүзеге асырылып жатқан жобаларда үздік қолжетімді технологиялар пайдаланылады және олар Еуропалық одақтың өнеркәсіптік шығарындылар жөніндегі директивасының талаптарына сәйкес келеді. Бұл қатаң экологиялық талаптардың сақталуын және атмосфералық ауаға таралатын ластаушы заттар шығарындыларының барынша азайтылуын қамтамасыз етеді.

«Қазіргі уақытта Қазақстан Республикасының экология және табиғи ресурстар министрлігі облыс орталықтарында қалдықтарды энергетикалық кәдеге жарату жобаларын дәл осындай шарттармен іске асыру үшін инвестициялық келісімдер жасасу мақсатында әлеуетті инвесторлармен тікелей келіссөздер жүргізу мүмкіндігін қарастыруда. Қазақстан Республикасының экология және табиғи ресурстар министрлігі еліміз аумағында қалдықтарды энергияға кәдеге жарату жобаларын іске асыруға ниетті әрі дайын инвесторлармен сындарлы өзара іс-қимыл жасауға және ұсынылған бастамаларды жан-жақты пысықтауға дайын», – деп мәлімдеді ведомство.

Бұған дейін сарапшылар Қазақстанда 2025 жылы коммуналдық қалдықтардың небәрі 14,5%-ы ғана қайта өңделгенін хабарлаған болатын. Оның ішінде қайта өңделген қалдықтардың тек 1%-ынан ғана қайталама шикізат өндірілген.

Шілде айында премьер-министр Олжас Бектенов экология министрлігіне рециклинг жобаларын іске асыруға қатысты шешімдерді әзірлеуге бір апта уақыт берген еді.

Биыл мамыр айында Алматыда электр энергиясын өндіретін қоқыс өңдеу зауытының құрылысы басталды. Жобаның инвесторы – Junxin Environmental Protection компаниясы. Жобаға салынатын инвестиция көлемі 130 млрд теңгеге бағаланып отыр.

Сондай-ақ Астанада тәулігіне 1 500 тоннаға дейін тұрмыстық қалдықты өңдеуге қауқарлы жоғары технологиялық қоқыс жағу зауыты салынатыны хабарланған болатын. Жобаның инвесторы – Қытайдың мемлекеттік Shenzhen Energy Environment корпорациясы, ал құрылысты қазақстандық «Базис» компаниясы жүргізеді. Жоба Астана әкімдігі мен Қытайдың ірі құрылыс компаниясы China State Construction Corporation қатысуымен жүзеге асырылады.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Kapital.kz-ті оқыңыз