Levi's екінші тоқсанда кірісін 8%-ға арттырып, жылдық болжамын жақсартты
Компанияның қаржылық нәтижелері сарапшылар күткеннен жоғары болғанымен, есеп жарияланғаннан кейін акциялары шамамен 6%-ға арзандады
Америкалық джинс киімдерін өндіруші Levi Strauss & Co. 2026 қаржы жылының екінші тоқсанында кірісін 8%-ға арттырып, жылдық қаржылық болжамын жақсартты, деп хабарлайды Интерфакс-Қазақстан.
Компанияның қаржылық есебіне сәйкес, 31 мамырда аяқталған үш айдағы кірісі өткен жылдың сәйкес кезеңіндегі 1,446 млрд доллардан 1,562 млрд долларға дейін өсті. Органикалық өсім 6%-ды құрады.
Өңірлер бойынша Солтүстік және Оңтүстік Америкадағы кіріс 9%-ға, Еуропада 4%-ға, Азияда 10%-ға ұлғайған.
Жалғасып жатқан операциялардан түскен пайда 19%-ға өсіп, 95 млн долларға жетті. Бір акцияға шаққандағы пайда 20 центтен 24 центке дейін артты.
Түзетілген пайда 24%-ға өсіп, 110 млн долларды құрады.
Levi's 2026 қаржы жылының қорытындысы бойынша кіріс өсімі 7–7,5% болады деп күтеді. Бұған дейін компания 5,5–6,5% өсім болады деп болжаған еді. Сонымен қатар органикалық өсім болжамы 4,5–5,5%-дан 5,5–6%-ға дейін көтерілді.
Сондай-ақ компания бір акцияға шаққандағы түзетілген пайданы бұрынғы 1,42–1,48 доллардың орнына 1,46–1,52 доллар деңгейінде күтетінін мәлімдеді.
Өткен тоқсанда Levi's акционерлеріне жалпы көлемі 53,9 млн доллар дивиденд төледі, бұл бір акцияға 14 центтен келеді. Келесі дивиденд төлемі бір акцияға 16 цент көлемінде 5 тамызда жүзеге асырылады. Оны 22 шілдедегі жағдай бойынша акционерлер тізіміне енген инвесторлар алады.
Сарапшылардың орташа болжамы бойынша, компанияның тоқсандық кірісі 1,52 млрд долларды құрайды деп күтілген. Сонымен қатар олар биылғы қаржы жылында бір акцияға шаққандағы түзетілген пайданы орта есеппен 1,5 доллар деңгейінде болжайды.
Қаржылық есеп жарияланғаннан кейін қосымша сауда-саттық барысында Levi's акцияларының бағасы 5,8%-ға төмендеді. Соған қарамастан соңғы үш айда компанияның нарықтық капитализациясы 7%-дан астам өсіп, 9,4 млрд долларға жетті. Ал осы кезеңде S&P 500 индексі 10,3%-ға көтерілді.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
