- Басты бет
- Тағайындаулар
- Әбілқайыр Сқақов Қазақстанның Қырғызстандағы Төтенше және өкілетті елшісі болып тағайындалды
Әбілқайыр Сқақов Қазақстанның Қырғызстандағы Төтенше және өкілетті елшісі болып тағайындалды
Мемлекет басшысы тиісті жарлыққа қол қойды
Мемлекет басшысының жарлығымен Әбілқайыр Бақтыбайұлы Сқақов Қазақстан Республикасының Қырғыз Республикасындағы Төтенше және өкілетті елшісі болып тағайындалды. Бұл туралы Ақорданың баспасөз қызметіне сілтеме жасаған Kapital.kz іскерлік ақпарат орталығы хабарлады.
Әбілқайыр Сқақов 1974 жылы Павлодар облысында дүниеге келген. Ол үш жоғары білім алған. Шәкәрім атындағы Семей мемлекеттік университетін «экономист және қаржыгер» мамандығы бойынша, Қазақ құқықтану және халықаралық қатынастар институтын «заңгер» мамандығы бойынша тәмамдаған. Сондай-ақ М.В. Ломоносов атындағы Мәскеу мемлекеттік университетінде іскерлік әкімшілендіру магистрі (MBA) дәрежесін алған.
Еңбек жолын 1995 жылы бастап, 2012 жылға дейін Павлодар және Қостанай облыстарының салық органдарында түрлі қызметтер атқарды. 2006-2008 жылдары Павлодар облыстық денсаулық сақтау департаменті директорының экономика жөніндегі орынбасары болды.
2012-2016 жылдары Қаржы министрлігі жүйесінде еңбек етіп, оның ішінде Астана қаласы бойынша Мемлекеттік кірістер департаментін басқарды. 2016-2019 жылдары Қорғаныс министрінің орынбасары ретінде қаржы және экономика мәселелеріне жетекшілік етті. Кейін Қаржылық мониторинг комитетінің төрағасы қызметін атқарды.
2020-2022 жылдары Павлодар облысының әкімі болды.
2023 жылғы қыркүйектен 2025 жылғы ақпанға дейін «Әлеуметтік медициналық сақтандыру қоры» АҚ басқарма төрағасы қызметін атқарды.
Әбілқайыр Сқақов «Ерен еңбегі үшін» медалімен және «Құрмет» орденімен марапатталған.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
