Apple АҚШ-та өндірілетін ЖИ-чиптеріне 30 млрд доллардан астам қаржы жұмсайды
Компания Broadcom-мен көпжылдық келісімге қол қойды
Америкалық Apple Inc. жаңа көпжылдық келісім аясында Broadcom компаниясының чиптерін сатып алуға 30 млрд доллардан астам қаржы жұмсамақ. Бұл туралы iPhone әзірлеушісі таратқан баспасөз хабарламасында айтылған, деп хабарлайды Интерфакс-Қазақстан.
Бұл – Apple компаниясының былтыр АҚШ экономикасына төрт жыл ішінде 600 млрд доллар инвестиция салу жөніндегі міндеттемесі аясындағы ең ірі инвестициясы. Жоба АҚШ-та 15 млрд-тан астам чип шығаруға және жүздеген америкалықты жұмыспен қамтуға мүмкіндік береді.
«Apple президент әкімшілігімен және америкалық кәсіпорындармен бірге АҚШ-та жартылай өткізгіш өнімдерін өндірудің толыққанды жеткізу тізбегін қалыптастыру бағытында жұмыс істеп жатыр. Бүгінгі мәміле осы жұмысты ілгерілетеді», – делінген компанияның баспасөз хабарламасында.
АҚШ президенті Дональд Трамп өткен жылы егер iPhone смартфондары елден тыс жерде өндірілетін болса, АҚШ-та сатылатын құрылғыларға «кемінде 25%» көлемінде баж салығын енгізетінін мәлімдеген болатын. Жаңа келісім аясында Broadcom компаниясының Колорадо штатындағы Форт-Коллинс қаласындағы өндірістік нысандарын кеңейту мен жаңғыртуға 1,5 млрд доллар инвестиция салынады. Мұнда компания заманауи радиоэлектрондық компоненттер мен сымсыз байланыс технологияларын шығарады.
Broadcom дүйсенбі күні Apple-мен технологиялық әріптестікті 2031 жылға дейін ұзартқанын хабарлады. Келісім аясында компания Apple өнімдерінің бірнеше буынына арналған арнайы чиптерді әзірлеп, жеткізеді. Чиптер жасанды интеллект міндеттерін өңдеуге арналған компоненттер өндірісінде сұранысы артып келе жатқан арнайы мақсаттағы интегралдық схемалар (ASIC) форматында болады.
Мәміленің қаржылық шарттары жарияланған жоқ. Бұған дейін Bloomberg агенттігі Apple компаниясы арнайы ЖИ-серверлерін әзірлеп жатқанын және оларды 2027 жылы іске қосуды жоспарлап отырғанын, ал Broadcom осы серверлерге арналған чиптерді дайындап жатқанын хабарлаған еді.
Еске салайық, Apple 2027 жылдың ортасына дейін кемінде бес жаңа iPhone моделін шығаруды жоспарлап отыр. Сондай-ақ компания жад чиптерінің қымбаттауына байланысты өз өнімдерінің бағасын көтеруді көздеп отырғаны хабарланған болатын. Бұдан бөлек, Apple Mac Mini компьютерлерінің өндірісінің бір бөлігін Азиядан АҚШ аумағына көшіреді.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
