Тимур Турловқа тиесілі «Сары-Арқа» әуежайы 2025 жылға дивиденд төлемейтін болды
Шешім компанияның теріс меншікті капиталына байланысты қабылданып отыр
Бизнесмен Тимур Турловқа тиесілі «Сары-Арқа» әуежайы» АҚ 2025 жылдың қорытындысы бойынша жай акцияларына дивиденд төлемейді. Мұндай шешімді компания акционерлері қабылдады, деп хабарлайды Kapital.kz іскерлік ақпарат орталығының тілшісі KASE деректеріне сілтеме жасап.
«Бұл шешім 2025 жылғы 31 желтоқсандағы жағдай бойынша әуежайдың меншікті капиталының 528,4 мың теңге көлемінде теріс болуына байланысты қабылданды», – делінген хабарламада.
Әуежайдың 2025 жылға арналған шоғырландырылған аудиттелген қаржылық есебіне сәйкес, әуе айлағы қатарынан екінші жыл шығынмен жұмыс істеп отыр. 2024 жылы шығын көлемі 912,2 млн теңгені құраса, 2025 жылы ол 1 млрд теңгеге жеткен.
«Сары-Арқа» әуежайы» АҚ Қарағанды әуежайының базасында құрылған. 2005 жылы ашық инвестициялық тендер нәтижесінде әуежайдың 100% мемлекеттік акциялар пакеті «Sky Service» ЖШС-не сатылды.
2024 жылдың мамырында Freedom Holding Corp. басшысы Тимур Турлов өзінің Turlov Private Holding жеке құрылымы арқылы «Сары-Арқа» әуежайы» АҚ-ның бас компаниясы саналатын «Sky Service» ЖШС құрылтайшыларының қатарына қосылды. Бұған дейін компанияның басым үлесі «Sky Service» арқылы «Верный Капитал» компаниялар тобының бұрынғы бас директоры Ерлан Оспановқа тиесілі болған. Мәміле нәтижесінде Ерлан Оспановтың үлесі 35%, ал Тимур Турловтың үлесі 60% болды.
«Бұл мәміле маған не үшін қажет? Мұндай мықты әрі ашық серіктеспен бірге компанияның дамуына жаңа серпін бере аламыз», – деген еді Ерлан Оспанов. Оның айтуынша, серіктестер Қарағанды әуежайын өңірлік авиациялық жүк хабына айналдыруды жоспарлаған.
2025 жылдың тамызында әуежайда отын құю кешенінің құрылысы басталды. Жобаны іске асыру үшін қытайлық компаниялар мен қазақстандық ASG компаниясы (құрамында Тимур Турлов, Ерлан Оспанов және Руслан Габбасов бар) қатысуымен Silkway Aviation Airport Development (Silu Hangkong) бірлескен кәсіпорны құрылды. Құрылысқа PetroChina да қосылды. Сонымен қатар тараптар Jet A-1 авиаотынын жеткізу, қалалар арасындағы әуе қатынасын дамыту және жүк ағындарын үйлестіру жөніндегі келісімдерге қол қойды. Silkway Aviation Airport Development бірлескен кәсіпорны әуе отынымен қамтамасыз етумен қатар, Қазақстан арқылы Қытайдан Еуропаға мультимодальды жүк тасымалын ұйымдастырумен де айналысады.
2026 жылдың көктемінде халықаралық сарапшылардың қатысуымен «Сары-Арқа» әуежайын 25 жылға дамытуға арналған ұзақмерзімді мастер-жоспар әзірленіп, таныстырылды.
«Стратегия әуежайды халықаралық деңгейдегі мультимодальды аэрохабқа айналдыруды және ArgoCity ірі жүк экожүйесін қалыптастыруды көздейді. Бұл инвестициялық жобаны іске асырудың негізгі бағыттарының бірі – 2025 жылы әуежай құрамына енгізілген «Сарыарқа» арнайы экономикалық аймағы аясындағы мамандандырылған субаймақты дамыту. Осы бастама шеңберінде 2026 жылдың қорытындысы бойынша әуежайдың жүк айналымын 100 мың тоннаға дейін жеткізу жоспарланған», – делінген әуежайдың 2025 жылға арналған қаржылық есебінде.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
