Әлемдік қор нарығында пандемиядан бергі ең ірі өсім тіркелді
Бірінші жартыжылдықта акциялармен жасалған мәмілелер көлемі 729 млрд долларға жетті
Әлемдік акциялар нарығындағы мәмілелер көлемі бірінші жартыжылдықта жылдық есеппен 73,1%-ға өсіп, 729,4 млрд долларға жетті. Бұл туралы Dealogic деректеріне сілтеме жасаған Mergermarket хабарлады, деп жазады Интерфакс-Қазақстан.
Бұл – тарихтағы осы кезең үшін тіркелген екінші ең жоғары көрсеткіш. Бұдан жоғары нәтиже тек 2021 жылы, пандемия кезінде орталық банктердің аса жұмсақ ақша-несие саясаты аясында тіркелген болатын.
Биылғы қаңтар-маусым аралығында IPO нарығында АҚШ көш бастады. Нью-Йорк қор биржасы (NYSE) мен Nasdaq алаңдары арқылы компаниялар шамамен 142 млрд доллар тартты. Бұл алғашқы жария орналастырулардың жалпы көлемінің 75%-дан астамын құрайды. Еуропада бұл көрсеткіш небәрі 13,3 млрд доллар болды.
Бұған дейін биржаға шыққан компаниялардың акцияларын қосымша орналастыру (follow-on offerings) көлемі де бірінші жартыжылдықта 37%-ға өсіп, 370 млрд доллардан асты.
Алты ай ішінде тартылған қаражаттың шамамен 30%-ы технологиялық компанияларға тиесілі болды. Маусым айында SpaceX компаниясының рекордтық 86,2 млрд долларлық IPO-сын есепке алғанда, бұл секторға тартылған қаржы көлемі 302 млрд доллардан асып, жалпы нарықтың 41,4%-ын құрады. Dealogic SpaceX-ті аэроғарыш саласындағы компаниялар қатарына жатқызады.
The Wall Street Journal басылымының жазуынша, технологиялық сектор бірінші жартыжылдықта 100 млрд доллардан астам инвестицияны бұған дейін тек екі рет – 2000 және 2021 жылдары ғана тартқан. Екі жағдайда да бұл кейін нарықтағы елеулі құлдыраудың алдында болған. Атап айтқанда, 2000 жылдың наурызы доткомдар көпіршігінің шарықтау кезеңі болса, 2021 жылғы IPO толқынынан кейін Nasdaq индексі 2022 жылдың бірінші жартысында күрт төмендеген.
Еске салайық, 2026 жылдың бірінші жартыжылдығында әлемдегі бірігу және жұтылу (M&A) мәмілелерінің көлемі өткен жылдың сәйкес кезеңімен салыстырғанда шамамен 30%-ға өсіп, 2,6 трлн долларға жетті.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
