Екібастұзда жалпы қуаты 250 МВт болатын ірі деректерді өңдеу орталықтары салынады
Жобаның бірінші кезеңі 2027 жылы, екіншісі 2028 жылы іске қосылады
Парламент палаталарының бірлескен отырысында премьер-министр Олжас Бектенов елдің цифрлық дамуы үшін Data Center Valley («ДӨО алқабы») жобасының маңызын түсіндірді, деп хабарлайды Kapital.kz іскерлік ақпарат орталығы үкіметтің баспасөз қызметіне сілтеме жасап.
Премьер-министрдің айтуынша, деректерді өңдеу орталықтары жасанды интеллектіні, цифрлық сервистерді және деректерге негізделген жаңа экономиканы дамытудың негізгі инфрақұрылымына айналып отыр. Сондықтан Қазақстан үшін сыртқы есептеу қуаттарын пайдаланумен қатар, өзінің де цифрлық инфрақұрылымын қалыптастыру маңызды.
«Қазір барлық мемлекеттік органның деректері Астанадағы қуаты 6 МВт болатын деректерді өңдеу орталығында сақталады. Келесі жылдың бірінші жартысында Екібастұзда қуаты 125 МВт болатын алғашқы деректерді өңдеу орталығын іске қосамыз. Ал 2028 жылы дәл осындай тағы бір 125 МВт-тық орталық пайдалануға беріледі. Бұл бағыттағы жұмысты әрі қарай да жалғастырамыз», – деді Олжас Бектенов.
Бұл бағытқа халықаралық технологиялық компаниялар да қызығушылық танытып отыр. Атап айтқанда, стратегиялық серіктесі NVIDIA болып табылатын Firebird компаниясымен келісімдерге қол жеткізілген. Жобаға шамамен 10 млрд доллар инвестиция тарту жоспарланып отыр.
Мұндай инфрақұрылымды дамыту Қазақстанның цифрлық егемендігін нығайтып, деректерді сақтау мен өңдеудің сенімділігін арттыруға, сондай-ақ жасанды интеллектіге арналған есептеу қуаттарын, бұлтты сервистерді дамытуға және цифрлық қызмет экспортын кеңейтуге негіз қалайды.
Еске салайық, Екібастұзда пилоттық «Деректерді өңдеу орталықтарының алқабы» жобасы іске асырылады. Бұған дейін жобаға шамамен 30 млрд доллар инвестиция тарту жоспарланғаны хабарланған болатын. Сондай-ақ Жасанды интеллект және цифрлық даму министрлігі, «Қазақтелеком» және Aleria компаниясы Data Center Valley жобасы бойынша үшжақты өзара түсіністік туралы меморандумға қол қойған еді. Presight AI компаниясының басшысы да жобаға қатысуға қызығушылық білдірген.
Сонымен қатар Екібастұзда жаңа әуежай салу мәселесі де қарастырылып жатыр. Мемлекет басшысы бұл бағытты пысықтауды тапсырған болатын. Президенттің айтуынша, бұл Павлодар облысының көлік қолжетімділігі мен инвестициялық тартымдылығын арттыруға ықпал етеді.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
