Құрылтай депутаттарының сайлауы 23 тамызға тағайындалды
Бұл туралы жарлыққа президент Қасым-Жомарт Тоқаев қол қойды
Қазақстан президенті Қасым-Жомарт Тоқаев «Қазақстан Республикасы Құрылтайының сайлауын тағайындау туралы» жарлыққа қол қойды, деп хабарлайды Ақорданың баспасөз қызметі.
«Қазақстан Республикасы Конституциясының 46-бабының 3) тармақшасына және 95-бабының 1-тармағына сәйкес қаулы етемін:
1. Қазақстан Республикасы Құрылтайы депутаттарының сайлауы 2026 жылғы 23 тамызға тағайындалсын;
2. Қазақстан Республикасының Орталық сайлау комиссиясы Қазақстан Республикасы Құрылтайы депутаттарының сайлауын дайындау мен өткізуді ұйымдастырсын.
3. Қазақстан Республикасының үкіметі, астана, облыстар және республикалық маңызы бар қалалардың әкімдері Қазақстан Республикасы Құрылтайы депутаттарының сайлауын ұйымдастырушылық, материалдық-техникалық және қаржылық қамтамасыз ету бойынша барлық қажетті шараларды дереу қабылдасын», – делінген құжат мәтінінде.
Жарлық алғашқы ресми жарияланған күнінен бастап қолданысқа енгізіледі.
Айта кетейік, кеше сенат өз тарихындағы соңғы отырысын өткізді.
Еске салайық, 2026 жылғы 15 наурызда Қазақстанда жалпыхалықтық референдум өтіп, оның қорытындысында жаңа Конституция қабылданды. Жаңартылған Ата заң 1 шілдеден бастап ресми түрде күшіне енді. Оның басты жаңалықтарының бірі – Сенаттың таратылып, бір палаталы Құрылтайға көшуі. Жаңа жоғары өкілді орган заң шығару өкілеттігіне ие болады және құрамына бес жыл мерзімге сайланатын 145 депутат кіреді.
Сонымен қатар, Халық Кеңесі құрылады. Оның құрамына 126 адам енеді.
Бұған дейін Мәулен Әшімбаев Құрылтайдың құрылуы тек институционалдық реформа ғана емес, сонымен қатар саясатқа басқарушылардың жаңа буынының келуіне мүмкіндік болуы тиіс екенін айтқан еді.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
