• Басты бет
• Мемлекет
• Қазақстандық мектептерде Конституция негіздері мен жеке қауіпсіздік пәндері оқытылады

Қазақстандық мектептерде Конституция негіздері мен жеке қауіпсіздік пәндері оқытылады

Оқушыларға төтенше жағдай кезіндегі әрекет ету, кибергигиена және интернеттегі қауіптерден қорғану үйретіледі

Жаңа оқу жылынан бастап мектептерде «Конституция негіздері» және «Жеке қауіпсіздік» атты жаңа міндетті пәндер енгізіледі. Жаңа Конституция нормаларына сәйкес оқу жоспарлары мен білім беру стандарттарын қайта қарау туралы үкімет отырысында Оқу-ағарту министрі Жұлдыз Сүлейменова мәлімдеді, деп хабарлайды Kapital.kz іскерлік ақпарат орталығы үкімет басшысының баспасөз қызметіне сілтеме жасап.

Министрдің айтуынша, ендігі басымдық теорияны жаттатуға емес, оқушылардың жауапкершілік сезімін қалыптастыруға және заманауи әлемде қауіпсіз өмір сүру дағдыларын дамытуға беріледі. Осыған байланысты 5–7-сынып оқушылары үшін «Конституция негіздері» пәні енгізіліп, онда мемлекет, азаматтардың құқықтары мен міндеттері туралы қарапайым әрі түсінікті тілде оқытылады.

Ал 8-11-сыныптарда «Заң және тәртіп» курсы енгізіледі. Оның мақсаты – жасөспірімдердің құқықтық сауаттылығын арттыру және құқық бұзушылықтың алдын алу.

Сонымен қатар 5-11-сыныптардың барлығына «Жеке қауіпсіздік» пәні міндетті болады. Бұл пән аясында оқушыларға төтенше жағдайларда дұрыс әрекет ету, кибергигиена қағидаларын сақтау және интернеттегі қауіп-қатерлерден қорғану тәсілдері үйретіледі.

«Жаңартылған білім беру мазмұны ең алдымен жеке тұлғаны жан-жақты дамытуға, іргелі білімді нығайтуға, азаматтық жауапкершілікті қалыптастыруға және заманауи құзыреттерді дамытуға бағытталады. Сонымен қатар тәрбие беру бағыты едәуір күшейтіледі. Білім беру жүйесіне «Адал азамат» бірыңғай тәрбие бағдарламасының құндылықтары, «Заң және тәртіп» қағидаты, «Таза Қазақстан» жалпыұлттық бастамасы, сондай-ақ жаңа Конституцияның негізгі идеялары мен құндылықтары толық көлемде енгізіледі. Осылайша мектеп тек білім беретін ұйым ғана емес, заңды құрметтейтін, еңбекті бағалайтын және мемлекет пен қоғам алдындағы жауапкершілігін сезінетін азаматтарды қалыптастыратын ортаға айналады», – деді министр.

Айта кетейік, бүгін Қазақстанда жаңа Конституция күшіне енді. Осыған орай президент Қасым-Жомарт Тоқаев қазақстандықтарға үндеу жасады.

Еске салайық, 2026 жылғы 15 наурызда Қазақстанда жаңа Конституция бойынша жалпыұлттық референдум өтті. Жаңартылған Ата заң 1 шілдеден бастап ресми түрде күшіне енді. Оған сәйкес Қазақстан Парламенті бір палаталы болады, оның құрамынан Сенат шығарылады. Жаңа заң шығарушы орган Құрылтай деп аталады. Сонымен қатар Халық кеңесі құрылып, оның құрамына 126 адам кіреді.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Kapital.kz-ті оқыңыз