Freedom Holding Corp. Түркиядағы банкті сатып алуға рұқсат алды
Холдингтің еншілес компаниясы Turkish Bank A.Ş.-тің 99,32% акциясын сатып алады
Freedom Holding Corp. (FRHC) компаниясының еншілес ұйымы – Freedom Finansal Hizmetler A.Ş. Түркияның Банктік қызметті реттеу және қадағалау агенттігінен (Banking Regulation and Supervision Agency, BRSA) және елдің Бәсекелестікті қорғау басқармасынан (Competition Authority) Turkish Bank A.Ş. банкінің 99,32% акциясын сатып алуға рұқсат алды. Бұл туралы Kapital.kz іскерлік ақпарат орталығына холдингтің баспасөз қызметі хабарлады.
«BRSA мен Бәсекелестікті қорғау басқармасының мақұлдауын алу мәмілені аяқтау жолындағы маңызды қадам болды. Бұл мәміле FRHC-тің негізгі дамушы нарықтарда толық интеграцияланған қаржылық қызметтер экожүйесін құруға бағытталған ұзақмерзімді стратегиясының бір бөлігі саналады. Мәміле аяқталғаннан кейін 1982 жылдан бері жұмыс істеп келе жатқан Turkish Bank A.Ş. холдингтің кеңейіп келе жатқан өңірлік платформасының негізгі элементіне айналып, брокерлік қызмет, инвестициялық бизнес және капитал нарығындағы операциялар бағыттарын толықтырады», – деп хабарлады холдинг.
2026 жылдың ақпанында қол қойылған акцияларды сатып алу-сату туралы келісімге (SPA) сәйкес, мәміле тек Turkish Bank A.Ş.-ке қатысты.
«TurkishBank Group-тың Ұлыбританиядағы және Солтүстік Кипр Түрік Республикасындағы банк бөлімшелері, сондай-ақ топтың басқа активтері мәмілеге кірмейді», – деп нақтылады баспасөз қызметі.
Freedom Holding Corp. бас атқарушы директоры Тимур Турлов:
«Freedom үшін Түркия – стратегиялық нарық. Біз бұл елге нақты мақсатпен келіп отырмыз. Қазақстанда цифрлық экожүйенің адамдардың күнделікті өмірінің ажырамас бөлігіне айнала алатынын дәлелдедік... Біз қаржылық сервистерді озық цифрлық өнімдермен бір платформада біріктірдік және олар бірін-бірі табиғи түрде толықтырып, күшейтеді. Дәл осы тәжірибені Түркия нарығына алып келуді көздеп отырмыз. Мұнда әлеуетті клиенттер саны Қазақстанмен салыстырғанда төрт-бес есе көп болуы мүмкін».
Холдингтің мәліметінше, мәміле аяқталғаннан кейін интеграциялау процесі басталады. Оның аясында технологиялық инфрақұрылымды дамытуға, клиенттік тәжірибені жақсартуға, жаңа өнімдер әзірлеуге және Freedom-ның Түркиядағы барлық бөлімшелерінің операциялық интеграциясын қамтамасыз етуге басымдық беріледі.
Сондай-ақ аталған рұқсаттардың алынуы Freedom-ның Түркиядағы брокерлік бизнесін құру жұмыстарының соңғы кезеңімен тұспа-тұс келгені атап өтілді.
Еске салайық, холдинг шетел нарықтарына экспансиясын кезең-кезеңімен жүзеге асырып келеді.
2025 жылдың қаңтарында Freedom Holding Corp.-тың еншілес компаниясы – Freedom Financial Services Inc. Түркияда брокерлік компания құратыны белгілі болды. Сол жылдың қарашасында Қазақстанның Қаржы нарығын реттеу және дамыту агенттігі «Фридом Банк Қазақстанға» (Freedom Bank) Грузияда «Фридом Банк Грузия» еншілес ұйымын құруға рұқсат берді. Банкті «ФБГ Компани» (FBG Company) АҚ арқылы іске қосу жоспарланған болатын.
«Қазақстан мен Грузияның реттеуші органдарымен келісімдер аяқталғаннан кейін бұл құрылымды коммерциялық Freedom Bank Georgia банкіне айналдыру жоспарланып отыр», – деп хабарлаған еді бұған дейін Freedom Bank.
Холдингтің күтіліп отырған ірі мәмілелерінің бірі – түрік банкін сатып алу. Мұндай жоспарлар алғаш рет 2025 жылдың желтоқсанында жарияланған болатын. Ал 2026 жылдың наурызында реттеуші органдардың рұқсатын алғаннан кейін Freedom Holding TurkishBank Group-тың түрік бөлімшесінің бақылау пакетін сатып алуға ниетті екені белгілі болды. Түркияның Turkiye Today басылымының жазуынша, түрік тарапындағы негізгі акционерлер – Ozyol Holding пен Кувейт Ұлттық банкі (NBK) банк капиталының 99,31%-ын құрайтын үлестерін Freedom Holding-тің Түркиядағы еншілес ұйымы Freedom Finansal Hizmetler AS-ке беруге келіскен.
2026 жылдың сәуірінде Тимур Турловтың Францияда банктік лицензия алу мүмкіндігін қарастырып жатқаны белгілі болды. Frank Media басылымы Freedom Holding бөлшек банкті сатып алу жөнінде келіссөздер жүргізіп жатқанын жазды. Компанияның баспасөз қызметі бұл ақпаратты растап, келіссөздердің соңғы кезеңге жақындағанын мәлімдеді.
Сол жылдың маусымында кәсіпкер Freedom Bank Пәкістанда филиал ашуды жоспарлап отырғанын хабарлады.
«Пәкістан – үлкен нарық. Ол аса бай ел емес, бірақ өте жас мемлекет және, менің ойымша, әлеуеті өте жоғары. Пәкістан халқының саны Қазақстанмен салыстырғанда 10-12 есе көп – 340 миллионнан асады. Елдің жалпы ішкі өнімі де шамамен Қазақстанмен бірдей. Сондықтан цифрлық банк бұл нарықта сұранысқа ие болады, өйткені оның шығындары төмен», – деген еді Тимур Турлов.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
