• Басты бет
• Экономика
• ТКШ мен электр энергетикасын жаңғыртуға 1,1 трлн теңгеден астам инвестиция тартылды

ТКШ мен электр энергетикасын жаңғыртуға 1,1 трлн теңгеден астам инвестиция тартылды

Серік Жұманғариннің айтуынша, ауқымды инвестициялар қыс мезгілінде жылу желілеріндегі апаттардың алдын алуға мүмкіндік берді

Парламент палаталарының бірлескен отырысында премьер-министрдің орынбасары – ұлттық экономика министрі Серік Жұманғарин 2023–2024 жылдары тұрғын үй-коммуналдық шаруашылығының маңызды инфрақұрылымын жаңғырту нәтижелері мен жаңа ұлттық жобаны әзірлеу тәсілдері туралы айтты, деп хабарлайды Kapital.kz іскерлік ақпарат орталығы үкіметтің баспасөз қызметіне сілтеме жасап.

«Ел үшін қажетті инвестиция көлемі өте ауқымды болғандықтан, табиғи монополиялар саласының барлығын бірден бағдарламаға енгізу мүмкін емес. Сондықтан жаңғырту кезең-кезеңімен, салалар бойынша және белгілі бір кезектілікпен жүзеге асырылып жатыр. 2023 жылы ең алдымен тозу деңгейі жоғары жылу желілері мен энергетикалық нысандарды жаңарту жобаларына басымдық берілді», – деді вице-премьер.

Серік Жұманғариннің мәліметінше, 2023-2024 жылдар аралығында коммуналдық секторға шамамен 605 млрд теңге, ал электр энергиясын өндіру саласына 577 млрд теңгеге жуық инвестиция тартылған. Осы кезеңде ел бойынша 12 мың шақырымнан астам жылу желісі жөнделді.

Атқарылған жұмыстың негізгі нәтижесі – соңғы жылдары қыс мезгілінде жылу желілерінде ірі апаттардың болмауы. Сонымен қатар коммуналдық сала қызметкерлерінің жалақысы 50%-дан 100%-ға дейін ұлғайтылды.

Үкімет бұл тәжірибенің барлығын жаңа ұлттық жобаны әзірлеу кезінде ескерген.

«Ұлттық жобаның басты ерекшелігі – инфрақұрылымның тозу қарқыны оны жаңарту қарқынынан асып кетпеуі үшін жаңғырту жұмыстарын жеделдетуді көздеп отырмыз. Жоба инженерлік желілерді қарқынды жаңартуды және қаржыландыру тетіктерін жетілдіруді қарастырады. Бұл бағытта тарифтік қаражатпен қатар халықаралық қаржы ұйымдарының капиталы, жеке инвестициялар және екінші деңгейлі банктердің пайыздық мөлшерлемесін субсидиялау тетіктері пайдаланылады», – деді премьер-министрдің орынбасары.

Еске салайық, 2026 жылы жылумен жабдықтау саласындағы инфрақұрылымның тозу деңгейін 48%-ға, ал электрмен жабдықтау саласында 62%-ға дейін төмендету жоспарланып отыр. 2025 жылғы қарашадан бастап ұлттық жобаға қатысатын барлық коммуналдық кәсіпорын тіркелген meks.zakup.sk.kz электронды сатып алу платформасы іске қосылды.

МЭКС ұлттық жобасы аясында сыйақы мөлшерлемесін субсидиялауға 35,5 млрд теңге қарастырылған. Коммуналдық желілерді жаңғырту жеті қаржыландыру тетігі арқылы жүзеге асырылады. Ең көп қаражат электр желілерін жаңартуға бағытталады. Бұл мақсатқа 3,8 трлн теңге қажет.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Kapital.kz-ті оқыңыз