Қазақстанда доллар неге қайтадан арзандай бастады?
Тимур Сүлейменовтің айтуынша, қазір валютаның құбылуына мұнай бағасы мен бизнес тарапынан болатын маусымдық сұраныс әсер етуде
Ұлттық банк төрағасы Тимур Сүлейменов теңгеге шаққандағы доллар бағамының құбылуы нарықтық факторлардың әсерінен қалыптасады, олардың ішінде әлемдік нарықтағы мұнай құны мен ел ішіндегі шетелдік валютаға деген сұраныс негізгі рөл атқаратынын айтты, деп хабаралйды Kapital.kz іскерлік ақпарат орталығының тілшісі хабарлайды.
Оның айтуынша, валюта нарығының қазіргі динамикасы көбінесе Қазақстанның негізгі экспорттық тауары – мұнай бағасының өзгеруімен байланысты. Шикізат құнының өсуі валюталық түсімнің артуына әкеледі, бұл теңге мен доллар бағамына әсерін тигізеді.
«Бізде болған бағам – бір доллар үшін 500 теңгеден астам – мұнай бағасы шамамен 65–70 доллар болған кезде қалыптасты. Негізгі экспорттық өнімнің бағасы екі есеге жуық, шамамен 70%-ға өскенде, валюталық түсім көлемі артады, бұл, сөзсіз, бағамның қалыптасуына әсер етеді», - деді Тимур Сүлейменов Ұлттық банкте өткен брифингте.
Ол валюта нарығындағы жағдай тек шетелдік валютаның ұсынысымен ғана емес, сонымен қатар экономика тарапынан оған деген сұраныс деңгейімен де анықталатынын атап өтті. Оның айтуынша, жаңа инвестициялық жобалар, корпоративтік сектор бағдарламалары, сондай-ақ мемлекет пен квазимемлекеттік компаниялардың шығындары айтарлықтай әсер етеді.
«Бұл ретте маусымдық сипат бар: жылдың басында сұраныс әдетте аз болады, ал ортасында және соңында – көбірек. Бұл маусымдылықты біз үнемі бақылап отырамыз», - деді Тимур Сүлейменов.
Ұлттық банк басшысы бағамның нығаю немесе әлсіреу жағына қарай құбылуы нарықтық процестердің табиғи бөлігі болып табылатынын және сұраныс пен ұсыныс арасындағы теңгерімді көрсететінін атап өтті.
«Сондықтан бағамның нығаю немесе әлсіреу бағытындағы қозғалыстары жүйелі сипатқа ие және іргелі нарықтық факторлармен анықталады», - деп түйіндеді ол.
Еске салсақ, Қазақстан қор биржасындағы (KASE) доллардың орташа өлшенген бағамы 5 маусымда сағат 11:00-де 486,79 теңгені құрады. Бейсенбідегі валюта саудасында теңге қайтадан нығаюын жалғастырды: сессия қорытындысы бойынша USD/KZT жұбы бір доллар үшін 485,18 теңге деңгейінде жабылды (-3,63 теңге). Бұл ретте сауда-саттық көлемі 295,0 млн долларды құрады (-42,6 млн доллар).
ҚҚҚ сарапшылары бағамның мұндай динамикасы импорттық келісімшарттарды төлеу және сыртқы қарызды өтеу немесе оған қызмет көрсету шеңберінде шетелдік валютаны ірі көлемде сатып алудың аяқталуымен байланысты болуы мүмкін деп есептейді.
Бұған дейін Ұлттық банк төрағасы Тимур Сулейменов мәжіліс кулуарында ұлттық валютаның күрт құлдырауы туралы әңгімелердің негізсіз екенін түсіндірген болатын. Алайда, оның айтуынша, ел экономикасының шынайы сценарийлерінде доллар бағамы 400 теңге деңгейінде де қарастырылмайды.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
