Атырау мұнай өңдеу зауытында жоспарлы жөндеу жұмыстары басталды
Зауыттағы АИ-92 бензинінің қоры елдің 34 күндік сұранысын қамтамасыз етуге жеткілікті
Атырау мұнай өңдеу зауыты (АМӨЗ) жоспарлы алдын алу жөндеу жұмыстары (ЖАЖ) режиміне көшті, деп хабарлайды Kapital.kz іскерлік ақпарат орталығы «ҚазМұнайГаз» ҰК» АҚ баспасөз қызметіне сілтеме жасап.
«2026 жылғы 26 маусымда Қазақстан Республикасының «Азаматтық қорғау туралы» заңының өнеркәсіптік қауіпсіздік саласындағы талаптарына және Энергетика министрлігі бекіткен кестеге сәйкес Атырау мұнай өңдеу зауытында жоспарлы алдын алу жөндеу жұмыстары басталды. ЖАЖ жабдықтардың сенімді жұмысын қамтамасыз ету, технологиялық процестердің тұрақтылығын сақтау және өндірістің жалпы тиімділігін арттыру мақсатында жүргізіледі», – делінген хабарламада.
Жөндеу жұмыстары аясында 20 реакторға, 213 резервуарға, 32 колоннаға және 231 жылу алмастырғыш жабдыққа міндетті техникалық куәландыру жүргізіледі. Сондай-ақ құбырлардың жекелеген учаскелері ауыстырылады. Бірқатар технологиялық қондырғыларда жалпы көлемі 335 тоннадан асатын катализаторлар жаңартылады.
Жеңіл мұнай өнімдері – автобензин, дизель және авиациялық отын өндірісін ұлғайту мақсатында ЭЛОУ АВТ-3 қондырғысындағы вакуумдық колоннаның ішкі құрылғыларын ауыстыру жоспарланған. Жабдықтарды жуу жұмыстары атмосфераға ластаушы заттардың шығарылуын барынша азайту үшін жабық дренаж жүйесінде жүргізіледі.
Технологиялық қондырғыларды кезең-кезеңімен іске қосу 2026 жылғы 10 шілдеден басталады.
Жөндеу жұмыстарына шамамен 1 685 маман мен 53 бірлік арнайы техника жұмылдырылған. ЖАЖ барысында еңбек қорғау, өнеркәсіптік және өрт қауіпсіздігі талаптарының сақталуына ерекше көңіл бөлінеді.
«ҚазМұнайГаз» мәліметінше, ішкі нарықты жанар-жағармаймен тұрақты қамтамасыз ету үшін жөндеу кезеңінде мұнай өнімдерін жеткізу алдын ала қалыптастырылған қор есебінен жүзеге асырылады.
Жөндеу жұмыстары басталғанға дейін АМӨЗ резервуарларында 38 мың тонна автобензин, 31,3 мың тонна дизель отыны және 6,8 мың тонна авиациялық отын жинақталған. Қазіргі уақытта елдегі мұнай өнімдері нарығындағы жағдай тұрақты. АИ-92 маркалы бензин қоры 34 күндік, ал дизель отынының қоры 32 күндік тұтынуды қамтамасыз етуге жеткілікті.
Еске салайық, биыл мамыр айында Шымкент мұнай өңдеу зауытындағы жоспарлы алдын алу жөндеу жұмыстары аяқталған болатын.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
