Кәсіпкерлік белгілері анықталған азаматтарға МКК-дан хабарлама келе бастады
Кімдерге табысын заңдастыру қажет
Қазақстандықтарға Мемлекеттік кірістер комитетінен салық органдарында заңдастырылмаған кәсіпкерлік қызметтен табыс алу белгілері туралы хабарламалар келе бастады, деп хабарлайды Kapital.kz іскерлік ақпарат орталығы МКК баспасөз қызметіне сілтеме жасап.
«Қазақстан Республикасы Қаржы министрлігінің Мемлекеттік кірістер комитеті 2026 жылдың I тоқсанындағы банктік операциялары бойынша кәсіпкерлік қызметтен табыс алу белгілері анықталған жеке тұлғаларға ақпараттық хаттар жолдады», – делінген хабарламада.
Хаттар бір мезгілде мынадай белгілер анықталған азаматтарға жіберіледі:
• қатарынан үш күнтізбелік айдың әрқайсысында жеке банк шотына 100 және одан да көп әртүрлі тұлғадан ақша қаражаты түскен;
• шот кәсіпкерлік қызметті жүргізуге арналмаған;
• көрсетілген кезеңдегі жалпы түсім көлемі 12 ең төменгі жалақыдан (ЕТЖ) асқан.
Ведомствоның түсіндіруінше, мұндай хатты алу жауапкершілікке тартылғанды білдірмейді. Оның мақсаты – ақпарат беру және азаматтарға өз қызметін салық заңнамасының талаптарына сәйкестендіруге мүмкіндік жасау.
Егер азамат мұндай хабарлама алып, іс жүзінде кәсіпкерлік қызметпен айналысып жүрсе, онда алған табысын заңдастыруы қажет:
• жеке кәсіпкер ретінде тіркелу (егер әлі тіркелмесе);
• алынған табысты тиісті салық есептілігінде көрсету;
• салық міндеттемелерін уақытылы орындау.
Салық төлеушінің мәртебесіне қарай табыс мынадай тәртіппен көрсетіледі.
Жеке кәсіпкер ретінде тіркелмеген немесе өзін-өзі жұмыспен қамтығандарға арналған арнайы салық режимін қолданатын жеке тұлғалар (мобильді қосымша арқылы чек рәсімделмеген сомалар бойынша) табысын 2026 жылға арналған кірістер мен мүлік туралы декларацияда (270.00-нысан) көрсетуі тиіс. Декларацияны 2027 жылғы 1 қаңтар мен 15 қыркүйек аралығында тапсырып, жеке табыс салығын 2027 жылғы 25 қыркүйекке дейін төлеуі қажет.
Жеке кәсіпкерлер үшін:
• жалпыға бірдей белгіленген режим қолданылған жағдайда табыс 2026 жылға арналған кәсіпкерлік қызмет бойынша жеке табыс салығы декларациясында (220.00-нысан) көрсетіледі. Есептілік 2027 жылғы 1 қаңтар мен 31 наурыз аралығында тапсырылады, салық 2027 жылғы 10 сәуірге дейін төленуі тиіс;
• оңайлатылған декларация негізіндегі арнайы салық режимін қолданатындар табысын 2026 жылдың бірінші жартыжылдығына арналған 910.00-нысандағы декларацияда көрсетеді. Оны 2026 жылғы 1 шілде мен 15 тамыз аралығында тапсырып, салықты 2026 жылғы 25 тамызға дейін төлеуі қажет.
Егер қызмет кәсіпкерлік сипатқа ие болмаса немесе алынған хатқа қатысты сұрақтар туындаса, 1414 байланыс орталығына немесе мемлекеттік кірістер органдарына жүгіну ұсынылады.
Мемлекеттік кірістер комитеті салық міндеттемелерін уақытылы орындау салықтық әкімшілендірудің кейінгі рәсімдерін болдырмауға мүмкіндік беретінін ескертеді. Міндеттемелер орындалмаған жағдайда салық төлеушіге камералдық бақылау нәтижесінде анықталған сәйкессіздіктер туралы хабарлама жіберіледі.
Бұған дейін Ержан Біржанов 2026 жылғы 1 қаңтардан бастап банктер қандай жағдайда қазақстандықтардың шоттарындағы ақша қозғалысы туралы мәліметтерді салық органдарына беретінін түсіндірген болатын.
2025 жылғы 11 желтоқсанда Қаржы министрлігі банктер 2026 жылғы 1 қаңтардан бастап қазақстандықтардың шоттарындағы ақша қозғалысы туралы ақпаратты салық органдарына беретін шекті соманы бекітті. Ал 2025 жылдан бастап Қазақстан банктері 2024 жылдың қорытындысы бойынша жеке кәсіпкерлердің, заңды тұлғалар басшыларының және олардың жұбайларының мобильді аударымдары туралы ақпаратты Мемлекеттік кірістер комитетіне ұсына бастады.
Мобильді аударымдарды бақылау кәсіпкерлік қызметті заңсыз жүргізетін, салықты толық төлемейтін немесе мүлде төлемейтін тұлғаларды көлеңкелі экономикадан шығаруға бағытталған.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
