• Басты бет
• Технологиялар
• Шетелдік инвесторларға Қазақстандағы алғашқы толық цифрлық қала – Алатауға инвестиция салу ұсынылды

Шетелдік инвесторларға Қазақстандағы алғашқы толық цифрлық қала – Алатауға инвестиция салу ұсынылды

Қалада инфрақұрылым, мемлекеттік қызметтер мен экономика Big Data негізіндегі бірыңғай цифрлық экожүйеге біріктіріледі

Қазақстан президенті Қасым-Жомарт Тоқаев Алатауды дамытуды елдің стратегиялық басымдығы деп атады. Шетелдік инвесторлар алдында сөйлеген сөзінде мемлекет басшысы болашақ қаланың «Digital by default» («Әдепкі бойынша цифрландыру») қағидаты бойынша жобаланып жатқанын атап өтті, деп хабарлайды Kapital.kz іскерлік ақпарат орталығы.

«Бүгінде Алатау – әлемдік деңгейдегі бірегей құқықтық режимі бар жедел даму аумағы. Қалыптастырылған нормативтік-құқықтық база жаһандық инвестицияларды тартуға және Алатауды жетекші халықаралық іскерлік орталықтардың біріне айналдыруға бағытталған. Қала Қазақстандағы алғашқы толық цифрлық орталық ретінде жобалануда. Мұнда аса маңызды инфрақұрылым, мемлекеттік қызметтер мен қала экономикасы үлкен деректер, озық технологиялар және заманауи басқару модельдері негізінде бірыңғай цифрлық экожүйеге біріктіріледі. «Digital by default» («Әдепкі бойынша цифрландыру») қағидатына сәйкес мемлекеттік басқарудың барлық үдерісі әуел бастан тек цифрлық форматта құрылады», – деді президент Шетелдік инвесторлар кеңесінің 38-ші пленарлық отырысында.

Ол Алатау қаласының бірыңғай цифрлық платформасы арқылы әкімдік, тұрғындар мен инвесторлар мемлекеттік қызметтерді алып, қажетті рұқсат құжаттарын рәсімдеп, арнайы құқықтық режимнің артықшылықтарын пайдалана алатынын түсіндірді. Бұдан бөлек, қалада цифрлық активтер саласындағы озық нормативтік-құқықтық база қолданылады. Ол криптовалюта биржаларының қызметі мен активтерді токенизациялауды қамтиды.

«Біз халықаралық инвесторларды осы бірегей юрисдикцияның артықшылықтарын пайдаланып, жоғары технологиялық әрі жоғары табысты жобаларды жүзеге асыруға арналған сенімді алаң ретінде қарастыруға шақырамыз», – деді Қасым-Жомарт Тоқаев.

Еске салсақ, 2025 жылдың мамырында сингапурлық Surbana Jurong компаниясымен бірлесіп әзірленген жаңа қаланың бас жоспары қабылданған болатын. Ал 2026 жылдың мамырында президент Қасым-Жомарт Тоқаев «Алатау қаласының арнайы құқықтық режимі туралы» Қазақстан Республикасының Конституциялық заңына қол қойды.

2028 жылға дейін Алатауда жалпы құны 365,1 млрд теңгені құрайтын инфрақұрылымдық жобаларды іске асыру жоспарланған. Бұған дейін Alatau City құрылысы бойынша бас кеңесші ретінде сингапурлық сарапшы тартылатыны хабарланған еді. Жаңа қалада өзіндік қаржылық архитектура, басқару моделі және арнайы құқықтық режим жұмыс істейді. Сондай-ақ Алатауға инфрақұрылым салу үшін мемлекеттік қарыз алу құқығы беріледі.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Kapital.kz-ті оқыңыз