Маңғыстаудағы екі клиникада 221 млн теңгеден астам қаражат жымқырылғаны анықталды
Ер адамдарға әйелдерге жасалатын қымбат операциялар рәсімделіп, емдеу құны 10 есеге дейін негізсіз өсірілген
Қаржылық мониторинг агенттігінің Маңғыстау облысы бойынша департаменті «ИБН СИНА» және SOFIE MED GROUP клиникалары басшылығының Әлеуметтік медициналық сақтандыру қорының қаражатын аса ірі көлемде жымқыру фактісі бойынша тергеу жүргізіп жатыр, деп хабарлайды Kapital.kz іскерлік ақпарат орталығының тілшісі ҚМА баспасөз қызметіне сілтеме жасап.
«Тергеу мәліметінше, «ИБН СИНА» және SOFIE MED GROUP медициналық орталықтарының лауазымды тұлғалары ер адамдарға қойылған «варикоцеле» диагнозы бойынша медициналық қызметтерді кодтау кезінде әйелдерге арналған жоғары технологиялық операцияның – «кіші жамбас ағзалары мен жатыр артерияларының тамырларын эндоваскулярлық эмболизациялау» қызметінің кодын көрсеткен. Соның салдарынан 200-ден астам ер адамға негізсіз қымбат медициналық қызметтер рәсімделіп, емдеу құны 10 есеге дейін ұлғайтылған. Ал 19 жағдайда пациенттер аталған клиникаларға жүгінгенін мүлде растаған жоқ», – деп мәлімдеді ҚМА.
Келтірілген шығын көлемі 221 млн теңгеден асты. Тергеу жалғасып жатыр.
Бұған дейін Қостанайда қылмыстық топтың субсидияларды заңсыз алу схемасын ұйымдастырғаны хабарланған болатын. Сондай-ақ Түркістан облысының ветеринариялық қызметінде бюджет қаражатын жымқыру схемасы әшкереленді. Көкшетауды абаттандыру кезінде 160 млн теңгеден астам қаржы жымқырылғаны анықталды. Елордадағы емханалардың бірінде 675 млн теңге бюджет қаражаты жымқырылды. «Восток Инжиниринг» ЖШС-нің басшысы іздеуге жарияланды. Тергеу нұсқасы бойынша, Шығыс Қазақстан және Абай облыстарындағы жеті маңызды нысанның құрылысына бақылаудың тиісті деңгейде жүргізілмеуі салдарынан мемлекетке 1,2 млрд теңгеден астам шығын келтірілген.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
