- Басты бет
- Технологиялар
- Meta жасанды интеллектке арналған бұлтты сервисті іске қосуды жоспарлап отыр
Meta жасанды интеллектке арналған бұлтты сервисті іске қосуды жоспарлап отыр
Компания Amazon, Microsoft және Google-дың бұлтты платформаларымен бәсекелеспек
Америкалық Meta Platforms Inc. клиенттерге есептеу қуаты мен жасанды интеллект модельдеріне қолжетімділік беретін бұлтты инфрақұрылым қызметін іске қосуды жоспарлап отыр. Бұл туралы Bloomberg агенттігі ақпараттандырылған дереккөздерге сілтеме жасап хабарлады.
Жаңа бағытта компания Amazon Web Services, Microsoft Azure және Google Cloud секілді жетекші бұлтты сервистермен бәсекелес болады.
Дереккөздердің мәліметінше, Meta жасанды интеллект саласындағы жобаларын дамыту үшін деректерді өңдеу орталықтарының қуатын ұлғайтып жатыр. Сонымен қатар компания артық есептеу ресурстарын сыртқы клиенттерге сатуды көздейді.
Meta өз инфрақұрылымында жұмыс істейтін түрлі жасанды интеллект модельдеріне ақылы қолжетімділік беруді де қарастырып отыр. Мұндай тәсілді Amazon компаниясының Bedrock сервисі қолданады. Бұл модель аясында Meta дата-орталықтарды өзі басқарып, әзірлеушілерден жасанды интеллект модельдерін пайдаланғаны үшін ақы алады.
Бұдан бөлек, компания CoreWeave үлгісі бойынша есептеу қуатын жеке қызмет ретінде ұсынуды жоспарлап отыр.
Жоба Meta-ның жасанды интеллект инфрақұрылымына жауап беретін Meta Compute бастамасы аясында әзірленіп жатыр.
Еске салсақ, бұған дейін Meta өзінің ең қуатты жасанды интеллект моделі – Muse Spark-ты таныстырған болатын. Бұл модель өткен жылы құрылған Meta Superintelligence Labs (MSL) зертханасында әзірленген алғашқы өнім саналады. Сонымен қатар компания қызметкерлерінің шамамен 20%-ын қысқартуды жоспарлап отырғаны хабарланған еді.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
