- Басты бет
- Технологиялар
- Қазақстан әуежайларына биометрия енгізіледі
Қазақстан әуежайларына биометрия енгізіледі
Көлік министрі авиация саласы қалай цифрландырылып жатқанын айтып берді
Қазақстанда жолаушылар мен жүк тасымалындағы тексеру уақытын қысқарту үшін цифрлық жүйелер енгізіліп жатыр. Бұл туралы бүгін Үкімет отырысында Қазақстанның Көлік министрі Нұрлан Сауранбаев айтты, деп хабарлайды Kapital.kz іскерлік ақпарат орталығының тілшісі.
Оның айтуынша, авиацияға цифрландыру енгізіліп жатыр. Мәселен, Q-Gate жүйесі бақылаудан өту уақытын 3 минуттан 50 секундқа дейін қысқартуға мүмкіндік береді.
«Қазіргі уақытта Астана және Алматы аэропорттарында 16 терминал жұмыс істейді. Биыл Шымкент, Атырау, Ақтөбе және Ақтауда тағы 16 терминал орнату жоспарланып отыр. Келесі кезеңде ішкі рейстерде биометрияны енгізу көзделген. Пилоттық жоба Астана–Шымкент бағыты бойынша іске асырылады», деді ведомство басшысы.
Сонымен қатар ол жүк сегментінде e-Freight жүйесі енгізіліп жатқанын атап өтті. Бұл жүк өңдеу уақытын 1 күннен 1 сағатқа дейін қысқартуға және процестерді толық цифрландыруға мүмкіндік береді, деп түсіндірді министр.
Айта кетейік, былтыр қазақстандық авиакомпаниялар 15 млн жолаушы тасымалдады. Көлік министрлігінің мәліметінше, биылғы жылдың алғашқы 4 айында жолаушылар саны 4 млн-нан асты. 2025 жылы аэропорттар 32 млн жолаушыға қызмет көрсетті. Сондай-ақ 173 мың тонна жүк өңделді.
Бұған дейін Қазақстанның авиациялық әкімшілігінің басшылығына Майкл Дэниел тағайындалғаны хабарланды. Сонымен қатар Үкімет Алматы әуежайын жаңғырту созылып кеткенін айтып, TAV Airports Holding компаниясына мерзім белгіленгенін мәлімдеді. Алматы әуежайының шатырын қалпына келтіру алты айға дейін созылуы мүмкін. Су басу оқиғасынан кейін әуе айлағының техникалық мәселелер жөніндегі вице-президенті тәртіптік жауапкершілікке тартылды.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
