• Басты бет
• Экономика
• Chevron Қазақстан мұнайын Баку – Тбилиси – Джейхан бағыты арқылы экспорттау мүмкіндігін қарастырып жатыр

Chevron Қазақстан мұнайын Баку – Тбилиси – Джейхан бағыты арқылы экспорттау мүмкіндігін қарастырып жатыр

Бұл мәселе «ҚазМұнайГаз» пен америкалық корпорация басшылығының кездесуінде талқыланды

Астанада «ҚазМұнайГаз» ҰК АҚ басқарма төрағасы Асхат Хасенов пен Chevron корпорациясының Upstream бағыты бойынша президенті Клэй Нефф Қазақстан мұнайын «Баку – Тбилиси – Джейхан» бағыты арқылы жеткізу мәселесін талқылады, деп хабарлайды Kapital.kz іскерлік ақпарат орталығы ұлттық компанияның баспасөз қызметіне сілтеме жасап.

«ҚазМұнайГаздың» мәліметінше, кездесу барысында тараптар негізгі бағыттар бойынша өзара ынтымақтастықтың қазіргі жай-күйін қарастырды. Атап айтқанда, «Теңізшевройл» ЖШС-нің тұрақты өндірістік қызметі мен өнеркәсіптік қауіпсіздігін қамтамасыз етуге басымдық бере отырып, Теңіз кен орнын одан әрі игеру жоспарлары талқыланды.

Сондай-ақ «ҚазМұнайГаз» пен Chevron геологиялық барлау саласындағы ынтымақтастық мәселелерін қарастырды. Қазіргі уақытта компаниялар Қазақстандағы перспективалы геологиялық барлау жобалары аясындағы өзара іс-қимыл мүмкіндіктерін зерделеп жатыр.

«Сонымен қатар кездесуде қазақстандық мұнайды әлемдік нарыққа Каспий құбыр консорциумы арқылы және қосымша экспорттық бағыт ретінде Баку – Тбилиси – Джейхан мұнай құбырымен жеткізу мәселесі талқыланды. Кездесу қорытындысы бойынша тараптар өзара тиімді әріптестікті одан әрі нығайтуға дайын екенін растады», – делінген ұлттық компанияның ақпаратында.

Еске салайық, бұған дейін Қасым-Жомарт Тоқаев Грузия премьер-министрі Ираклий Кобахидземен келіссөздер барысында Қазақстанның «Баку – Тбилиси – Джейхан» мұнай құбыры арқылы мұнай транзитін ұлғайтуды жоспарлап отырғанын мәлімдеген болатын.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Kapital.kz-ті оқыңыз