• Басты бет
• Экономика
• Алматы әуежайын жаңғырту созылып кетті: TAV Airports Holding компаниясына мерзім белгіленді

Алматы әуежайын жаңғырту созылып кетті: TAV Airports Holding компаниясына мерзім белгіленді

Барлық жұмыс 1 шілдеге дейін аяқталуы тиіс

Премьер-министрдің баспасөз қызметінің хабарлауынша, Нұрлыбек Нәлібаев Алматыдағы көлік-логистика, энергетика, индустрия және туризм салаларындағы жобалармен танысты.

ҚР премьер-министрінің бірінші орынбасары Нұрлыбек Нәлібаев жұмыс сапары барысында Алматы қаласындағы негізгі көлік-логистикалық, энергетикалық, индустриялық және туристік нысандарды аралады. Сапарға қала әкімі Дархан Сатыбалды, әкімдік басшылығы, сондай-ақ жауапты ведомстволар мен салалық ұйымдардың өкілдері қатысты.

Алматы әуежайына бару барысында Нұрлыбек Нәлібаев нысан инфрақұрылымын дамыту жобаларының қазіргі жай-күйімен танысты. Атап айтқанда, перрон ғимараты, ұшақтарды мұздануға қарсы өңдеу алаңы, жаңа жүк тұрақтарының құрылысы және ішкі рейстер терминалын реконструкциялау жұмыстары қаралды. Әуежайдың жаңа халықаралық терминалының жалпы ауданы 56 мың шаршы метрді құрайды. 93 млрд теңге көлеміндегі инвестицияның арқасында нысанның өткізу қабілеті жылына 14 млн жолаушыға дейін артты. 2024 жылдың маусымында жаңа терминал пайдалануға берілгеннен кейін ескі ғимаратқа түсетін жүктеме азайып, ол толықтай ішкі рейстерге қызмет көрсетуге көшті.

Сондай-ақ бірінші вице-премьерге салынып жатқан нысандар мен алдағы кезеңге арналған жоспарлар таныстырылды. «Алматы халықаралық әуежайы» АҚ президенті Косе Гөкер нысанды басқаруға алған TAV Havalimanları Holding A.Ş. (TAV Airports Holding) компаниясы өткен жылдың тамыз айында жалпы құны 360 млн доллар болатын бес жылдық бас жоспарды бекіткенін айтты. Құжатта терминалдарды реконструкциялау, ұшу-қону жолағын күрделі жөндеу, жерүсті қызмет көрсету техникасын сатып алу, жүк перроны мен борттық тамақтану нысандарын салу, қонақүй мен көпдеңгейлі автотұрақ тұрғызу және өзге де жобалар қарастырылған.

Нұрлыбек Нәлібаев мемлекет басшысы Қазақстанды өңірдегі жетекші транзиттік экономикалардың қатарына қосуды тапсырғанын атап өтіп, үкімет бұл міндетті басым бағыт ретінде қарастырып, жан-жақты қолдау көрсетіп отырғанын айтты.

«Мен премьер-министрдің тапсырмасымен әуежайдағы жұмыстардың барысымен танысу үшін арнайы келдім. Алматы халықаралық әуежайын жаңғырту – Қазақстанды Орталық Азиядағы негізгі авиациялық хабтардың біріне айналдыруға бағытталған стратегиялық шешім. Алайда жұмыстардың қарқыны өте төмен. Алматы – туристер көп келетін ең әсем қалаларымыздың бірі. Қала келбетіне нұқсан келтіріп, туристерге қолайсыздық туғызып отырған әуежай аумағындағы құрылыс жұмыстарын 1 шілдеге дейін аяқтау қажет. Құрметті Косе Гөкер мырза, жолаушылар мен туристер тарапынан орынды сынға себеп болған созылған жұмыстарды аяқтайтын уақыт келді. Туристік ағын артатын жазғы маусым қарсаңында жаңғырту қарқынын жеделдетіп, халықтың мүддесін ескеру қажет. Ал қала әкімдігі өз кезегінде жаңғырту жұмыстарының сапасы мен мерзімінде аяқталуын қатаң бақылауда ұстауы тиіс», — деді Нұрлыбек Нәлібаев.

Ол сондай-ақ жақында нөсер жауын салдарынан Алматы әуежайының халықаралық терминалын су басқан жағдайға жеке тоқталды. Бұл оқиға қоғамда үлкен резонанс тудырып, қала тұрғындары мен шетелдік қонақтардың теріс реакциясына себеп болған. Осыған байланысты бірінші вице-премьер жұмыстың басты өлшемі сапа екенін еске салып, Алматы әкімдігіне әуежайдың көлік инфрақұрылымын қалалық қоғамдық көлік желісімен, соның ішінде болашақ метро бағытымен ықпалдастыруды тапсырды.

Премьер-министрдің бірінші орынбасары сондай-ақ «Алматы-1» вокзалына барып, өткен жылдың наурызында басталған реконструкция жұмыстарының барысын тексерді. Жобалық-сметалық құжаттаманы мемлекеттік сараптама порталына жүктеу аяқталғаны туралы ақпарат берілді, алайда қорытындыны алу мерзімі 2026 жылғы 11 тамызға ауыстырылған.

«Біз премьер-министрдің тапсырмасымен Алматы-1 вокзалын жаңғырту барысымен танысу үшін келгенде, «Қазақстан темір жолы» АҚ жұмысында кемшіліктер анықталды. Жаз мезгілінде вокзал тәулігіне 12 мың жолаушыны қабылдап, жөнелтеді, ал қыста шамамен 7 мың адамға қызмет көрсетеді. Қазір оларға жыл бойы қолайсыздық туындап отыр. Жоспарланған жұмыстар соңына дейін жеткізілмегендіктен, жолаушылар қиындық көруде. Ірі мегаполисте орналасқан осындай маңызды нысандағы жұмыс қарқыны ешқандай сын көтермейді. Жазғы демалыс маусымы басталып келеді. Сондықтан жұмысты жеделдету қажет. Еліміздің тарихында бір мезетте 121 вокзал жаңғыртылған жағдай бұрын болмаған. Мемлекет басшысының арнайы тапсырмасымен жүзеге асырылып жатқан бұл маңызды жобаны сапалы әрі белгіленген мерзімде орындау қажет. «Қазақстан темір жолы» басшылығына Алматы-1 вокзалындағы жұмыстарды қысқа мерзімде аяқтауды тапсырамын. Қала әкімдігі жұмыстардың барысы мен қарқынын күнделікті бақылауда ұстауы тиіс. Бұл мәселе үкіметтің қатаң бақылауында», — деді премьер-министрдің бірінші орынбасары.

Нұрлыбек Нәлібаев мердігер компанияға жобалық-сметалық құжаттаманың сараптамадан өтуін жеделдетуді, жабдықтарды уақытылы жеткізуді тапсырды. Ал қала әкімдігіне барлық жұмысты бақылауда ұстау жүктелді.

Сондай-ақ премьер-министрдің бірінші орынбасары Үлкен Алматы айналма автомобиль жолына (БАКАД) қатысты мәселелерге назар аударды. Алматы қаласы жол инфрақұрылымын дамыту басқармасының басшысы Олжас Шабданов трассаға алты нүктеде радиалды жолдарды қосу бойынша құрылыс-монтаж жұмыстарының барысы туралы баяндады. Бұл бағытта қажетті жер учаскелерін сатып алу мен босатуға қатысты мәселелер бар. Мысалы, Сабатаев көшесіне дейінгі учаскеде 410 жер телімінің тек 118-і ғана сатып алынған. Ал Ақын Сара көшесінің бойындағы 66 жер телімі толықтай мемлекет меншігіне қайтарылған. Алайда жылыту маусымында жоғары вольтты электр желілерін ажырату мүмкін болмағандықтан, 110 кВ тіректерін демонтаждау кейінге қалдырылған. Бұл учаскедегі жұмыстарды биылғы тамызда аяқтау жоспарланған. Қалған радиалды жолдарда да жұмыстар жалғасып жатыр.

Атап айтқанда, Алматы қаласы мен облыс арасындағы учаскелердегі жұмыс қарқынын сақтау үшін қала бюджетінен жер телімдерін сатып алуға, жолдардың жобалық құжаттамасын әзірлеуге және облыс аумағындағы құрылыс жұмыстарына қаржы бөлінген. Мемлекет басшысының Алматының жол-көлік жүйесін дамыту жөніндегі тапсырмасын ескере отырып, БАКАД-тағы құрылыс жұмыстарын жеделдету тапсырылды.

Алматыға жұмыс сапары аясында Нұрлыбек Нәлібаев ЖЭО-2 мен ЖЭО-3 нысандарына барып, ауқымды жаңғырту жұмыстарының барысымен танысты.

Алматының Алатау ауданында орналасқан ЖЭО-2 — қаладағы ең ірі жылу көзі. Жаңғырту жобасының басты мақсаты — энергетикалық кешенді табиғи газға көшіру арқылы тұрақты жылу және энергиямен жабдықтауды қамтамасыз ету, сондай-ақ атмосфераға таралатын зиянды шығарындыларды азайту. Жоба аясында жылу қуаты 952 Гкал/сағ, электр қуаты 600 МВт болатын заманауи газ станциясын іске қосу көзделген.

Жобаны іске асыру барысында үш газ турбинасы мен генератор орнатылған. Жабдықтарды жеткізу 99%-ға орындалды. Қосалқы инфрақұрылым мен жолдардың құрылысы аяқталған. Негізгі нысандардағы құрылыс-монтаж жұмыстарының жалпы дайындық деңгейі шамамен 55%-ды құрайды. Қазіргі уақытта негізгі корпус ғимаратында, су жылыту қазандықтарында, су және газ дайындау бекеттерінде, сондай-ақ электр техникалық инфрақұрылым нысандарында жұмыстар жалғасуда. Негізгі жабдықтарды жеткізуді қоса алғанда, барлық жұмыс бекітілген кестеге сәйкес жүргізіліп жатыр. Жобаны 2026 жылдың соңында аяқтау жоспарланған.

Сонымен қатар премьер-министрдің бірінші орынбасары Алматы облысының Іле ауданы аумағында орналасқан ЖЭО-3-ті де аралады. Жаңғырту аясында станцияда қуаты кемінде 450 МВт болатын бу-газ қондырғысы салынып, тозған жабдықтар жаңартылады. Мердігер ретінде қазақстандық компаниялар консорциумы белгіленген.

Қазіргі уақытта қадалы алаңды дайындау жұмыстары жүргізілуде, газ турбиналық қондырғының алғашқы жиынтығы іргетасқа орнатылған, жабдықтардың бір бөлігі құрылыс алаңында монтаждалған. Жобалық-сметалық құжаттама мемлекеттік сараптамадан өту кезеңінде. Реконструкцияны 2027 жылы аяқтау жоспарланған.

Нұрлыбек Нәлібаев Алматыны дамыту және қала тұрғындарының өмір сапасын жақсарту мәселелері мемлекет басшысының ерекше бақылауында екенін атап өтті. Энергетикалық нысандардың сенімді әрі тиімді жұмысын қамтамасыз ету үшін үкімет тарапынан барлық қажетті шара қабылданған. Осыған байланысты ол жаңғырту жұмыстарын белгіленген кестеден кешіктірмей, уақытылы аяқтауды тапсырды.

Сондай-ақ жұмыс сапары барысында премьер-министрдің бірінші орынбасары Нұрлыбек Налибаев Алматы тау кластері, Almaty Superski жобаларының іске асырылуымен және Индустриялық аймақтың жұмысымен танысты.

Айта кетейік, оңтүстік астана әуежайының ескі терминалындағы жөндеу жұмыстарын 2026 жылдың басында аяқтау жоспарланған болатын. Сондай-ақ 2028 жылға қарай халықаралық әуежай аумағында транзиттік жолаушылар мен экипаждарға арналған жаңа қонақүй кешенін салу жоспарланып отырғаны хабарланған еді.

Еске салайық, мамыр айында Алматы әуежайында қатты жаңбыр салдарынан шатырға зақым келіп, терминалды су басқан болатын. Хабарланғандай, қалпына келтіру жұмыстары алты айға созылуы мүмкін. Әуежайдың техникалық мәселелер жөніндегі вице-президенті тәртіптік жауапкершілікке тартылды.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Kapital.kz-ті оқыңыз