Алматы индустриялық аймағында 11 жаңа жоба іске қосылады
Индустриялық аймақ аумағын 376 гектарға кеңейтпек
Биылғы жылдың соңына дейін Алматының индустриялық аймағында 11 жаңа инвестициялық жобаны іске қосып, жаңа шағын өнеркәсіптік парктер ашып, аумақты кеңейтудің үшінші кезеңін бастағалы отыр, деп хабарлайды Kapital.kz іскерлік ақпарат орталығы Алматы әкімдігінің баспасөз қызметіне сілтеме жасап.
Индустриялық аймақ директоры Ерлан Жайлаубайдың мәліметінше, биыл индустриялық аймақта жалпы құны 12,6 млрд теңгені құрайтын 11 жоба іске қосылмақшы. Соның арқасында 691 жаңа жұмыс орны ашылады. Оның алтауы өнеркәсіптік секторға жатады.
Ең маңызды жобаның қатарында жылу мен су жүйесіне арналған жабдықтар өндірісін кеңейту, Euro Truck Service логистикалық кешенін салу, парақ ПВХ шығаратын кәсіпорын ашу, газоблоктар мен ALC-панельдер өндірісін іске қосу, тұрмыстық қағаз өнімдерін шығаратын зауыт ашып, металлдан жасалған жол мен көпір конструкциясын өндіретін кәсіпорын да бар.
Ерлан Жайлаубайдың айтуынша, жаңа жобаның барлығы отандық өнеркәсіпті дамытудың басым бағыттарына сай қолға алынды.
«Құрылыс материалдары, машина жасау, көлік-логистика, химия өнеркәсібі, қалдықты қайта өңдеу мен күнделікті тұтынатын тауарларды өндіретін салалар қарқынмен дамып келе жатыр. Дәл осы салалар әртараптандырылған замандық экономиканың негізін құрайды, импортты алмастыруға ықпал етіп, ішкі нарықтағы отандық өнімнің үлесін арттыруға сеп болады», — деді ол.
Сонымен қатар шағын және орта бизнеске арналған инфрақұрылымды дамытуды да қатар қолға алып жатыр. Биыл Алматыда жалпы ауданы 22 мың шаршы метрден асатын 5 жаңа шағын өнеркәсіптік парк ашу жоспарланған. Бұл 400-ден астам жаңа жұмыс орнын құруға жәрдемдесіп, өндірістік кәсіпорындарды орналастыру мүмкіндігін кеңейтеді.
Индустриялық аймақтың ұзақ мерзімді дамуына да ерекше назар аударылады. Алматының әкімдігі қазір өнеркәсіптік алаңды кеңейтудің үшінші кезеңін пысықтап жатыр. Атап айтқанда индустриялық аймақ аумағы шамамен тағы 376 гектарға ұлғаяды. Қазір жалпы аумағы 323 гектар болатын жер учаскесі сатып алынған.
Жаңа кезеңді іске асыру қосымша жоғары технологиялы өндірісті орналастыруға, жаңа инвесторларды тартуға, мыңдаған жұмыс орнын құрып, қала бюджетіне түсетін салық көлемін де едәуір арттырады.
Бүгінгі таңда Алматы индустриялық аймағы қарапайым өндірістік алаң шеңберінен шығып, толыққанды өндірістік экожүйеге айналғанын атап өтті. Автомобиль жасау саласының дамуы қосалқы бөлшектер өндіретін кәсіпорындардың пайда болуын ынталандырады, құрылыс материалдарын өндіру ішкі нарықты отандық өніммен қамтамасыз етеді, логистикалық кешендер жеткізу тиімділігін арттырады, ал қайта өңдеу кәсіпорындары айналмалы экономика қағидаттарын енгізуге ықпал етеді.
Дамудың негізгі бағыты ретінде жоғары қосылған құны бар жобаларға инвестиция тарту, машина жасау, электронды және химиялық өнеркәсіпті дамыту, жаңа буын құрылыс материалдарын өндіру, логистикалық инфрақұрылымды жаңғырту, өнеркәсіптік қалдықты қайта өңдеу мен өндірістік процестерге цифрлық технологияны кеңінен енгізу айқындалған.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
