Кеңес Рақышевтің Altaris Holding компаниясы немен айналысады
Fincraft Group жаңа құрылымның құрылу мақсатын түсіндірді
Fincraft Group иесі Кеңес Рақышев пен Alturion Holding Ltd бірлесіп Астана халықаралық қаржы орталығында (AХҚО) тіркеген Altaris Holding Ltd мұнай-газ және өзге де перспективалы жобаларды іске асырумен айналысады. Бұл туралы Kapital.kz іскерлік ақпарат орталығының сауалына жауап ретінде топтың баспасөз қызметі хабарлады.
«Altaris Holding Ltd әртүрлі салалардағы, оның ішінде мұнай-газ секторындағы перспективалы жобаларды іске асыруға қатысу үшін құрылды. Жекелеген құрылымды құру инвестицияларды шоғырландыруға, жобаларды басқарудың тиімділігін арттыруға, сондай-ақ қаржыландыру тартудың икемді тетігін қамтамасыз етуге мүмкіндік береді», – деп мәлімдеді компания өкілдері.
Кеңес Рақышев Altaris Holding Ltd компаниясын Астана халықаралық қаржы орталығының алаңында 2026 жылғы 24 маусымда тіркеді. Компанияның қызмет түрі «холдингтік қызмет» ретінде көрсетілген. Компанияның бас директоры – Әнуар Жанғытаев. Kompra дерегіне сәйкес, ол электр энергетикасы саласында жұмыс істейтін Schilling Ventures Ltd жеке компаниясының құрылтайшысы болып табылады.
Altaris Holding Ltd құрылтайшылары – кәсіпкер Кеңес Рақышевке тиесілі Fincraft Energy Holding Limited және Alturion Holding Ltd.
Кеңес Рақышев Fincraft Group құрамындағы еншілес Fincraft Energy Holding Limited компаниясын АХҚО алаңында 2025 жылғы 10 қарашада тіркеген болатын. Оның қызметі де «холдингтік қызмет» ретінде белгіленген. Жарғылық капиталы – 50 млн теңге.
Бұл компания капитал нарығында жұмыс істеу, шоғырландыру жүргізу және топтың мұнай-газ жобаларына инвестиция тарту үшін құрылған. Оның негізгі міндеті – қолданыстағы активтерді дамыту және көмірсутектерді барлау, өндіру және өңдеу саласындағы жаңа жобаларға қатысу.
Alturion Holding Ltd де АХҚО қатысушысы болып табылады. Компания 2026 жылғы 4 маусымда тіркелген. AFSA сайтында оның қызметі «холдингтік қызмет» ретінде көрсетілген. Компанияның құрылтайшысы – ALTURION FZCO. LinkedIn-дегі мәліметке сәйкес, бұл компания Біріккен Араб Әмірліктерінің Дубай қаласында тіркелген. Ол басқарушылық консалтингпен айналысып, халықаралық компанияларға стратегиялық, операциялық және комплаенс бағыттары бойынша қолдау көрсетуге маманданған.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
