• Басты бет
• Технологиялар
• Президент түркі елдерінің ЖИ орталықтарының желісін құруға шақырды

Президент түркі елдерінің ЖИ орталықтарының желісін құруға шақырды

Бұған қоса мүше мемлекеттердің IT хабтарының бірлескен орталығын ашуға шақырды

Түркі елдеріне білім-ғылым саласына қажетті мамандар даярлайтын оқу орталықтары мен ғылыми мекемелер керек. Қазақстан Президенті Қасым-Жомарт Тоқаев Түркістанда өтіп жатқан Түркі мемлекеттері ұйымының бейресми саммитінде осыған қатысты бірқатар ұсынысын жариялады, деп хабарлайды Kapital.kz іскерлік ақпарат орталығы Ақордаға сілтеме жасап.

Оның пікірінше, Түркі елдеріне өзара тәжірибе алмасу, бірлесіп кадрлар даярлау және озық технологияларды енгізу өте маңызды.

«Сондықтан Түркі елдерінің жасанды интеллект орталықтарының желісін құруды ұсынамын. Біз Қазақстанда жаңа форматтағы технологиялық оқу орны – Жасанды интеллект университетін ашуды жоспарлап отырмыз. Жоғары оқу орнында түркі мемлекеттерінің азаматтарын оқыту үшін арнайы гранттар бөлуге дайынбыз», деді Мемлекет басшысы.

Бұл ретте бағдарламалау, жасанды интеллект және озық цифрлық технология салалары бойынша түркі елдерінің жастары арасында жыл сайын ғылыми-технологиялық олимпиада ұйымдастыру қажеттігіне назар аужарды. Бұл бастамаларды жүзеге асыру үшін Түркі инвестициялық қоры тарапынан қаржылай көмек көрсетуге болды, деді ол.

«Биыл Қор нақты жобалар бойынша жұмыс істеу тәсіліне көшті. Жарғылық капиталы 600 миллион долларға жетті. Оны ұлғайтуға болады. Бұл – айрықша мәні бар стратегиялық ресурс. Сол себепті Қор барлық стартапқа қолдау көрсетіп, инфрақұрылымдық жобаларды іске асыруға белсене атсалысады деп сенеміз. Қор толыққанды қызмет көрсетуге тиіс. Мүше мемлекеттерді осы міндетті жедел жүзеге асыруға шақырамын», деп қосты Президент.

Сонымен қатар Қазақстан басшысы саммиттеТүркі кеңесіне мүше мемлекеттердің IT хабтарының бірлескен орталығын ашуды ұсынды.

«Қазір әрбір елде IT-жобаларға арналған технопарктер бар. Мен Түркі кеңесіне мүше мемлекеттердің IT хабтарының бірлескен орталығын ашуды ұсынамын. Орталыққа «Turkic ai» атауын беріп, оны Alem.ai орталығында орналастыруға болады. Бірлескен хаб ортақ мүдделерімізді ілгерілетуге ықпал етері сөзсіз», деді Қасым-Жомарт Тоқаев.

Еске салсақ, бұған дейін Қазақстан Президенті Түркі мемлекеттеріне ғарышты бірлесе игеруді ұсынған болатын. Бұл технологиялық дербестігімізді нығайтып, инновациялық әлеуетімізді арттыруға мүмкіндік беретінін атап өтті.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Сізге қызықты болуы мүмкін

Kapital.kz-ті оқыңыз