Кентауда құны 3,2 млрд теңгені құрайтын екі өнеркәсіптік кәсіпорын іске қосылды
Жаңа зауыттар жоғары жылдамдықты интернет желілеріне арналған оптикалық кабель мен электр жабдықтарына арналған металл шкафтар шығарады.
Кентау қаласындағы Turan арнайы экономикалық аймағында екі жаңа зауыт пайдалануға берілді. Kentau Cable Industries кәсіпорнында жоғары жылдамдықты интернет желілеріне арналған оптикалық кабель шығарылса, ElectroCore зауытында электр жабдықтарына арналған металл шкафтар өндіріледі. Бұл туралы Түркістан облысы әкімдігінің баспасөз қызметіне сілтеме жасаған Kapital.kz іскерлік ақпарат орталығы хабарлады.
Kentau Cable Industries жобасының құны 1,7 млрд теңгені құрайды. Кәсіпорын жылына 33 мың шақырым оптикалық кабель және 12 мың шақырым микроқұбырлар пакетін өндіруге қауқарлы. Зауытта кабель өнімдерін шығарудың толық өндірістік циклі жолға қойылған.
ElectroCore жобасына 1,5 млрд теңге инвестиция тартылды. Кәсіпорынның жылдық өндірістік қуаты 12 мың өнім бірлігіне жетеді. Мұнда 100-ге жуық жаңа жұмыс орны ашылды.
«Кентау ежелден өнеркәсіп қаласы ретінде танылған. Бүгінде қала қайтадан қарқын алып, жаңа даму кезеңіне қадам басты. Осы маңызды жобаның жүзеге асуына үлес қосқан инвесторларға, құрылысшыларға, мамандарға және еңбек ұжымына алғысымды білдіремін. Өнеркәсіпті дамыту бағытындағы жұмыстарды жалғастырамыз», – деді Түркістан облысының әкімі Нұралхан Көшеров.
«Kentau Cable Industries» және «ElectroCore» ЖШС директоры Асқар Баймырзаұлы өндірісті кезең-кезеңімен кеңейтіп, өнім түрлерін көбейту және жаңа жұмыс орындарын ашу жоспарланып отырғанын айтты.
Бұған дейін Түркістан облысында кабель өндіру және түсті металдарды өңдеу зауытын салу жоспарланып отырғаны хабарланған болатын. Henan Sulipu Cable Co қытайлық компаниясы бұл жобаға 8,5 млрд теңге инвестиция құюды көздеп отыр.
2026 жылдың алғашқы бес айының қорытындысы бойынша Түркістан облысының экономикасына 614,2 млрд теңге инвестиция тартылып, бұл көрсеткіш 150,5%-ға өсті. Ал 2025 жылдың қорытындысында өңірге тартылған тікелей шетелдік инвестиция көлемі 1 млрд 998,2 млн долларды құрап, жылдық жоспар төрт есеге артығымен орындалды. Осы көрсеткіш бойынша өңір республикада бірінші орында тұр.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
