• Басты бет
• Мемлекет
• Павлодар облысындағы Қаныш Сәтбаев атындағы каналды жаңғырту жұмыстары қалай жүріп жатыр

Павлодар облысындағы Қаныш Сәтбаев атындағы каналды жаңғырту жұмыстары қалай жүріп жатыр

Нысанда 19 сорғы агрегаты мен 17 трансформаторды ауыстыру көзделген

Су ресурстары және ирригация вице-министрі Жандос Сәлімов Павлодар облысындағы негізгі су шаруашылығы жобаларының іске асырылу барысымен танысты, деп хабарлайды Kapital.kz іскерлік ақпарат орталығы Су ресурстары және ирригация министрлігінің баспасөз қызметіне сілтеме жасап.

Атап айтқанда, вице-министр Қаныш Сәтбаев атындағы каналдағы сорғы агрегаттарын жаңғырту, №87 бөгетті қайта жаңарту және «Ертіс – Успенка» каналын реконструкциялау жұмыстарының барысын көрді.

Нысандарды аралау барысында Жандос Сәлімов мердігер ұйымдардың өкілдерімен кездесіп, барлық жобаны сапалы әрі белгіленген мерзімде аяқтауды тапсырды.

«Бұл жобаларды іске асыру гидротехникалық құрылыстардың сенімділігін арттырып, халық пен ауыл шаруашылығы тауарын өндірушілерді сумен қамтамасыз етуді жақсартады, сондай-ақ өңірдегі су ресурстарын пайдалану тиімділігін күшейтеді. Атқарылып жатқан жұмыстардың ауқымы мен маңызын ескере отырып, министрлік олардың жүзеге асырылуын тұрақты бақылауда ұстап отыр», – деді су ресурстары және ирригация вице-министрі.

Министрліктің мәліметінше, Қаныш Сәтбаев атындағы каналды жаңғырту жөніндегі Жол картасына сәйкес, нысанда 19 сорғы агрегаты мен 17 трансформаторды ауыстыру жоспарланған. Қазіргі уақытта бес сорғы агрегатын жаңарту жұмыстары аяқталуға жақын. Жақын арада тағы бес агрегатты реконструкциялау басталады. Сонымен қатар каналдың энергетикалық инфрақұрылымын жаңғырту аясында жоспарланған 17 трансформатордың сегізі орнатылды.

Жол картасын жүзеге асыру канал жұмысының сенімділігі мен тиімділігін арттырып, тұтынушыларды сумен үздіксіз қамтамасыз етуге, сондай-ақ гидротехникалық құрылыстарды пайдалану тәуекелі мен күтіп ұстау шығындарын азайтуға мүмкіндік береді.

Айта кетейік, Қаныш Сәтбаев атындағы канал Қарағанды, Павлодар облыстары мен Астана қаласын ауызсумен қамтамасыз етеді. Сондай-ақ канал суын осы өңірлердегі өндіріс орындары мен шаруа қожалықтары пайдаланады. Гидротехникалық нысанның жалпы ұзындығы – 458 шақырым.

Сонымен қатар Қаныш Сәтбаев атындағы каналдан Астанаға дейін су құбырын тарту аясында өнімділігі тәулігіне 342 мың текше метр болатын үш сорғы станциясын салу жоспарланған. Бұдан бөлек, өнімділігі тәулігіне 210 мың текше метр болатын №4 сорғы-сүзгілеу станциясын тұрғызу көзделіп отыр.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Kapital.kz-ті оқыңыз