• Басты бет
• Экономика
• Абай облысында $1,5 млрд инвестицияға алюминий зауыты мен жел электр станциялары салынады

Абай облысында $1,5 млрд инвестицияға алюминий зауыты мен жел электр станциялары салынады

Қытайлық инвестормен жасалған келісім аясында жылына 300 мың тонна алюминий өнімі өндіріліп, қуаты 1 ГВт болатын ЖЭС іске қосылады

Абай облысында құны 1,5 млрд доллар болатын ірі өнеркәсіптік және энергетикалық жобалар жүзеге асырылады. Бұл туралы облыс әкімі Берік Уәлидің Қытайдың Ордос қаласында Inner Mongolia Wanjiang Invest компаниясымен ынтымақтастық туралы меморандумға қол қоюы барысында белгілі болды, деп хабарлады облыс әкімдігінің баспасөз қызметі.

Келісімге сәйкес, өңірде жылына 300 мың тонна алюминий өнімін шығаратын зауыт пен жалпы қуаты 1 ГВт болатын жел электр станциялары салынады. Жобалар өңірдің өнеркәсіптік әлеуетін арттыруға, жаңартылатын энергетиканы дамытуға, жаңа жұмыс орындарын ашуға және экономиканың тұрақты өсуіне серпін береді.

Жұмыс сапары барысында Берік Уәли компанияның өндірістік кешенін аралады. Холдинг көмір өндіру және өңдеу, жаңа энергетика, жабдық жасау және құрылыс салаларында жұмыс істейді. Компанияның жылдық айналымы 5 млрд юаньнан асады.

Облыс әкімі сондай-ақ Ордос қаласындағы бірқатар өндіріс орындарының жұмысымен танысты. Олардың қатарында жылына 300 мыңға дейін энергия үнемдейтін жылыту құрылғыларын шығаратын Inner Mongolia Wanzhong Yinuan Technology Co., Ltd және дайын тағамдар мен жартылай фабрикаттар өндіретін Ordos Wanpu Shanfang Food Co., Ltd кәсіпорындары бар.

Жалпы, Абай облысы делегациясының Қытайға жұмыс сапары аясында жалпы құны 4 млрд долларды құрайтын меморандумдарға қол қойылды. Оның ішінде Бақты ауылында құны 1,5 млрд доллар болатын индустриялық парк салу жобасы да бар.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Kapital.kz-ті оқыңыз