Шымкентте кәсіпкерлерді бопсалады деген күдікпен блогерлер ұсталды
ІІМ мәліметінше, күдіктілер әлеуметтік желіге әшкерелейтін видеоларды жариялаймыз деп ақша талап еткен
Шымкентте кәсіпкерлерден ақша бопсалады деген күдікпен блогерлер ұсталды, деп хабарлайды Kapital.kz іскерлік ақпарат орталығы Ішкі істер министрлігінің Polisia.kz ақпараттық ресурсына сілтеме жасап.
«Шымкент қаласы полиция департаментінің ұйымдасқан қылмысқа қарсы күрес басқармасының қызметкерлері әлеуметтік желілерде әшкерелейтін бейнематериалдарды жариялаймыз деп қорқытып, ақша бопсалаумен айналысқан топтың заңсыз әрекетінің жолын кесті. Жедел іс-шаралар барысында Instagram желісінде шамамен 150 мың оқырманы бар жергілікті блогердің үш сыбайласымен бірге кәсіпкерлер мен мемлекеттік қызметшілерді әдейі бейнежазбаға түсіргені анықталды», – делінген ақпаратта.
Бұған қызметтік міндеттерін орындау кезіндегі болжамды тәртіптік құқық бұзушылықтар мен кәсіпкерлік қызметке қатысты болуы мүмкін заң бұзушылықтар себеп ретінде пайдаланылған.
Күдіктілер түсірілген бейнематериалдарды әлеуметтік желілерде жарияламау үшін азаматтардан ақша талап ету құралы ретінде қолданған. Олар ұсталып, қамауға алынды. Қазір тергеу амалдары жүргізіліп жатыр.
Еске салайық, бұған дейін сенатор Геннадий Шиповских блогерлерді, инфлюенсерлерді және онлайн-платформаларды азаматтарға зиян келтіретін контент арқылы миллиондаған қаралым жинайды деп сынға алған болатын. Оның пікірінше, қазақстандық әлеуметтік желілер қауіпті жарнама таралатын алаңға айналып барады.
Сондай-ақ 2025 жылғы қарашада Мәжілісте балалардың әлеуметтік желілерге қолжетімділігін шектеу мәселесі көтерілген еді.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
