Қазақстанда жаңғыртудан кейін 30 теміржол вокзалы пайдалануға берілді
Олардың қалай жаңартылғаны туралы көлік министрлігі мәлімдеді
Қазақстан өңірлерінде реконструкциядан өткен 30 теміржол вокзалы мен жолаушылар инфрақұрылымы нысаны пайдалануға берілді, деп хабарлайды Kapital.kz іскерлік ақпарат орталығы Көлік министрлігінің баспасөз қызметіне сілтеме жасап.
Көлік министрлігінің мәліметінше, бұл – соңғы жылдардағы теміржол вокзалдарын жаңғырту бойынша ең ауқымды жоба. Реконструкция нәтижесінде жолаушыларға жасалған жағдай едәуір жақсарып, қауіпсіздік пен жайлылық деңгейі артты, нысандардың өткізу қабілеті ұлғайды, сондай-ақ теміржол саласы қызметкерлері үшін заманауи еңбек жағдайлары жасалды.
Жұмыстар барысында ғимараттардың қасбеттері мен шатырлары жаңартылып, энергия үнемдейтін витраждар орнатылды. Сонымен қатар жылыту, сумен жабдықтау, желдету, кондиционерлеу, өрт қауіпсіздігі және бейнебақылау жүйелері жаңғыртылды. Ведомствоның атап өтуінше, құрылыс және реконструкция кезінде негізінен отандық өндірістің материалдары пайдаланылды.
Кедергісіз орта қалыптастыруға ерекше көңіл бөлінді. Вокзалдарда пандустар, лифтілер, бейімделген кіреберіс топтары мен санитарлық бөлмелер, тактильді жолақтар, арнайы касса аймақтары жабдықталды. Нысандардың санатына қарай ана мен бала бөлмелері, медициналық пункттер, жүк сақтау камералары қарастырылып, жолаушылар ағынын тиімді ұйымдастыру үшін үй-жайлар қайта жоспарланды.
Кешенді жаңғырту вокзал ғимараттарымен ғана шектелмей, жолаушылар платформаларын, вокзал маңындағы алаңдарды және инженерлік инфрақұрылымды да қамтыды. Барлық нысан қауіпсіздік талаптарына, санитарлық нормаларға және қызмет көрсету стандарттарына сәйкестендірілді.
Елдегі теміржол вокзалдарының басым бөлігі 1950–1970 жылдары салынған, ал кейбір ғимараттар 80–100 жылдан бері пайдаланылып келеді. Нысандардың шамамен 70%-ы ондаған жыл бойы күрделі жөндеуден өтпеген.
Реконструкциядан кейін өңірлер бойынша пайдалануға берілген нысандар:
• Абай облысы – Ауыл және Белағаш станцияларының вокзалдары;
• Ақмола облысы – Курорт-Бурабай, Шортанды, Макинка және Ақкөл;
• Атырау облысы – Ганюшкино және Аққыстау;
• Батыс Қазақстан облысы – Семиглавый Мар, Қазақстан және Шыңғырлау;
• Қарағанды облысы – Қарағанды-Сұрыптау, Жаңа-Қарағанды және Нұра вокзалдары, сондай-ақ Қарағанды-Сұрыптау станциясының жұп бағыттағы жолаушылар платформасы жаңартылды;
• Қостанай облысы – Аманқарағай және Құсмұрын;
• Қызылорда облысы – Жаңақорған, Қазалы, Шиелі және Талап станциясының платформасы;
• Алматы облысы – Қонаев және Шамалған;
• Жетісу облысы – Талдықорған;
• Солтүстік Қазақстан облысы – Тайынша, Жаңаесіл және Саумалкөл;
• Шығыс Қазақстан облысы – Риддер және Шемонаиха;
• Павлодар облысы – Бозшакөл платформасы.
Жұмыстар мемлекет басшысының көлік инфрақұрылымын дамыту және жолаушылар тасымалының сапасын арттыру жөніндегі тапсырмаларын іске асыру аясында жүргізілді.
Айта кетейік, 2025 жылы елде 124 теміржол вокзалын кешенді жаңғырту жұмыстары басталған болатын. Бұған дейін 36 вокзалда құрылыс-монтаж жұмыстарының аяқталғаны хабарланған еді.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
