Alatau City Bank мемлекетке тағы 125,3 млрд теңгені мерзімінен бұрын қайтарады
Алдыңғы екі жылда банк 150 млрд теңге қайтарды
Alatau City Bank директорлар кеңесі мемлекеттен алған қаржылық көмектің 125,3 млрд теңгесін мерзімінен бұрын ішінара қайтаруды мақұлдады. Мұндай шешім банк басшылығы 29 маусымда қабылдады, деп хабарлайды Kapital.kz іскерлік ақпарат орталығы банктің баспасөз қызметіне сілтеме жасап.
Қаражат мемлекеттік қолдау бағдарламалары аясында бұрын шығарылған облигацияларды мерзімінен бұрын өтеу арқылы қайтарылады. Бұған дейін банк мемлекетке жалпы сомасы 150 млрд теңгені қайтарған. Оның ішінде 2024 жылы – 100 млрд теңге, 2025 жылы – 50 млрд теңге.
«Тағы 125,3 млрд теңгені мерзімінен бұрын қайтару туралы шешім Alatau City Bank-тің қаржылық жағдайының тұрақтылығы, капиталдандыру деңгейінің жоғары болуы және қызметінің тұрақты нәтижелері арқасында мүмкін болды», – деді Alatau City Bank директорлар кеңесінің төрағасы Қуат Қожахметов.
Еске салсақ, Alatau City Bank басқарма төрағасы Гүлмира Жұмаділлаева өз өтінішімен қызметінен кеткен болатын. Ол қаржы институтын 2024 жылдың сәуірінен бері басқарды. 2026 жылғы 1 шілдеден бастап басқарма төрағасы болып Ануар Қуандықов тағайындалды.
Бұған дейін Jusan Bank ресми түрде Alatau City Bank болып қайта аталды.
2015 жылы мемлекеттік қолдау кейіннен Halyk Bank құрамына өткен Қазкоммерцбанкке көрсетілді. 2017 жылы қаржылық тұрақтылықты арттыру бағдарламасына Еуразиялық банк, Банк ЦентрКредит, Bank RBK және Jusan Bank кірді. Соңғысына дейін мемлекеттік қолдау оның ізашарлары – АТФБанк пен Цеснабанкке берілген болатын. Ал 2020 жылы мемлекеттік қолдауды Нұрбанк алды. Бағдарлама Қазақстанның банк секторын сауықтыру мақсатында қабылданған.
2023 жылы Қаржы нарығын реттеу және дамыту агенттігі балансында мемлекеттік қолдау қаражаты бар банктерге дивиденд төлеуге шектеу енгізді. Акционерлерге дивиденд төлеу үшін екінші деңгейлі банктер мемлекеттен алған көмектің дивиденд көлемінің 10%-дан 66%-ына дейінгі бөлігін қайтаруы тиіс.
Еске салсақ, 2025 жылдың ақпанында Kaspi.kz компаниясы кәсіпкер Вячеслав Кимнің Jusan Bank-ті сатып алуға Қаржы нарығын реттеу және дамыту агенттігіне өтінім бергенін хабарлаған болатын. Сол кезде Ғалымжан Есенов банк акцияларының 19,67%-ына тікелей, ал First Heartland Securities арқылы 77,86%-ына иелік етті. 2025 жылғы 3 маусымда агенттік Вячеслав Кимге First Heartland Jusan Bank АҚ-ның ірі қатысушысы мәртебесін иеленуге келісім берді. Кейін банк Alatau City Bank болып қайта аталды. Ал 2025 жылғы 11 шілдеде Вячеслав Ким бұрынғы иесі Ғалымжан Есеновтен Alatau City Bank акцияларының 100%-ын сатып алу мәмілесін аяқтады.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
