ЕҚДБ Қазақстандағы жобаларға 800 млн еуродан астам қаржы бөлді
Жыл қорытындысы бойынша банк инвестициясының көлемі 1,3 млрд еуродан асуы мүмкін
Қазақстан Республикасының Премьер-министрі Олжас Бектенов Қазақстан Президенті жанындағы Шетелдік инвесторлар кеңесінің 38-ші пленарлық отырысына қатысу үшін Астанаға келген Еуропалық қайта құру және даму банкінің (ЕҚДБ) президенті Одиль Рено-Бассо, ExxonMobil компаниясының аға вице-президенті Питер Ларден және Marubeni Corporation компаниясының басқарушы атқарушы директоры Сатору Ичинокавамен бірқатар кездесу өткізді, деп хабарлайды Primeminister.kz.
Кездесулер барысында Қазақстан президенті Қасым-Жомарт Тоқаевтың Парламент палаталарының бірлескен отырысында үкіметке жүктеген экономиканы дамыту және жаңа инвестициялық циклді іске асыру міндеттері аясында ынтымақтастықты одан әрі кеңейту перспективалары талқыланды.
ЕҚДБ президенті Одиль Рено-Бассомен кездесуде әлеуметтік, көлік, өнеркәсіптік және инженерлік инфрақұрылымды салу мен жаңғырту, цифрландыру және жасанды интеллект, сондай-ақ қаржы саласындағы ынтымақтастықты нығайту және бизнесті қолдау шаралары қарастырылды.
Премьер-министр Қазақстандағы инвестициялық ахуалды жақсарту мен экономиканың тұрақты дамуына банктің қосып отырған елеулі үлесін атап өтті. Бірлескен жұмыс жылдарында ЕҚДБ портфелі шағын және орта бизнес, қаржы, тұрғын үй-коммуналдық шаруашылық, энергетика, ауыл шаруашылығы және ақпараттық технологиялар салаларындағы жалпы құны 12,7 млрд долларды құрайтын 354 жобаға жетті.
Одиль Рено-Бассо биыл ЕҚДБ-ның Қазақстан экономикасына салатын инвестиция көлемі тарихи деңгейге жететінін мәлімдеді. Қазіргі уақытта Қазақстандағы жобаларға 800 млн еуродан астам қаржы бөлінген. Жалпы жыл қорытындысы бойынша инвестиция көлемі 1,3 млрд еуродан асуы мүмкін.
Кездесу қорытындысы бойынша тараптар ынтымақтастықты одан әрі кеңейтуге және жаңа бірлескен жобаларды іске асыруға дайын екенін растады.
ExxonMobil компаниясының аға вице-президенті Питер Ларденмен өткен келіссөздер барысында қазіргі өндірістік көрсеткіштер мен технологиялық даму мәселелері талқыланды. ExxonMobil Теңіз, Қашаған және Каспий құбыр консорциумы секілді ірі бірлескен жобаларды іске асыруға қатысады. Тараптар ынтымақтастықтың нәтижелі сипатын атап өтіп, өзара іс-қимылды одан әрі нығайтуға дайын екенін жеткізді.
Marubeni Corporation компаниясының басқарушы атқарушы директоры Сатору Ичинокавамен кездесуде Қазақстан мен Жапония арасындағы экономикалық ынтымақтастықты одан әрі дамыту перспективалары қаралды. Marubeni компаниясының Қазақстан үшін энергетика және өнеркәсіп өндірісі салаларындағы сенімді әрі ұзақмерзімді серіктес екені атап өтілді. Тараптар іскерлік байланыстарды нығайту және екі елдің бизнес қауымдастықтары арасындағы практикалық ынтымақтастықты кеңейтудің маңызын атап өтті.
Кездесулер қорытындысында тараптар өзара тиімді ынтымақтастықты одан әрі нығайтуға, қолданыстағы жобаларды іске асыруды жалғастыруға және Қазақстан экономикасының басым секторларында жаңа инвестициялық бастамаларды пысықтауға мүдделі екенін растады.
Айта кетейік, бұған дейін ЕҚДБ Қазақстанда қор нарығын дамыту бағдарламасын әзірлейтіні хабарланған болатын.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
