Қазақстанда ипотека бойынша шекті мөлшерлеме LTV коэффициентіне тәуелді болады
2027 жылдан бастап бастапқы жарнасы жоғары қарыз алушылар үшін ипотека арзандауы мүмкін
Қазақстанның Қаржы нарығын реттеу және дамыту агенттігі (ҚНРДА) мен Ұлттық банк ипотекалық тұрғын үй заемдары бойынша жылдық тиімді сыйақы мөлшерлемесінің (ЖТСМ) жаңа шекті деңгейлерін бекітті.
Реттеушінің хабарлауынша, 2027 жылғы 1 қаңтардан бастап ипотека бойынша шекті ЖТСМ кепіл мүлкі құнына шаққандағы қарыз сомасының арақатынасына (LTV коэффициенті) қарай белгіленеді.
Жаңа тәртіпке сәйкес:
• LTV коэффициенті 0,7-ге дейін (қоса алғанда) болса, шекті ЖТСМ – 20%;
• LTV коэффициенті 0,7-ден жоғары болса, шекті ЖТСМ – 25%.
Ал 2027 жылдың 1 қаңтарына дейін ипотекалық заемдар бойынша қазіргі 25% мөлшеріндегі шекті ЖТСМ сақталады. Басқа несие өнімдері бойынша шекті мөлшерлемелер өзгеріссіз қалады.
Осылайша, бастапқы жарнасы жоғары болып, қарыз сомасының кепіл құнына қатынасы төмен болатын заем алушылар үшін ипотеканың пайыздық мөлшерлемесі арзандауы мүмкін.
Тиісті өзгерістер ҚНРДА басқармасының 2026 жылғы 30 маусымдағы №101 және Ұлттық банк басқармасының №79 бірлескен қаулысымен бекітілді.
Еске салсақ, Қазақстанда ипотека бойынша шекті мөлшерлемені 25%-дан 20%-ға төмендету бірнеше рет кейінге шегерілген болатын. Енді реттеуші бірыңғай шекті мөлшерлемеден бас тартып, оны қарыз алушының бастапқы жарнасына байланысты саралап белгілеу тәсіліне көшіп отыр.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
