Қазақстан қандай жағдайда Ресейге жанар-жағармай жеткізу мүмкіндігін қарастырады
Елдің ішкі нарығын қамтамасыз ету басымдық болып қала береді, деп мәлімдеді Энергетика министрлігі
Ресейге жанар-жағармай материалдарын (ЖЖМ) жеткізу мәселесіне Қазақстан Республикасы Энергетика министрінің кеңесшісі – ресми өкілі Әсел Серікбаева пікір білдірді, деп хабарлайды Kapital.kz іскерлік ақпарат орталығы.
«Ресей Федерациясына жанар-жағармай материалдарын жеткізу мүмкіндігі туралы ақпаратқа қатысты Қазақстан Республикасы Энергетика министрлігі мынаны хабарлайды. Егер Ресей үкіметінен автомобиль отынын сатып алуға қатысты ресми өтініш түссе, Қазақстан ЖЖМ-ды өзара тиімді коммерциялық шарттармен жеткізу мүмкіндігін қарастыруға дайын. Мұнай өнімдерін жеткізу саласында халықаралық келісімдер мен коммерциялық шарттар тек бос ресурстық әлеует болған жағдайда ғана жасалуы мүмкін. Сөзсіз басымдық – елдің ішкі нарығын толық әрі үздіксіз қамтамасыз ету. Экспорттық жеткізілімдер Қазақстан азаматтары мен экономикасының қажеттіліктерін қамтамасыз етуге қауіп төнбеген жағдайда ғана жүзеге асырылуы мүмкін», – деді Әсел Серікбаева.
Оның айтуынша, қазіргі уақытта елде жанар-жағармай тапшылығының туындау қаупі жоқ. Ішкі нарықта жазғы және туристік маусым кезінде тұтынушыларды тұрақты әрі үздіксіз қамтамасыз етуге жеткілікті мұнай өнімдерінің қоры қалыптастырылған.
«Жалпы резерв көлемі 1,1 млн тоннадан асады. Оның ішінде АИ-92 және АИ-95 маркалы бензин, сондай-ақ дизель отыны бар. Бұл қорлар тұрақты түрде мұнай өңдеу зауыттарының ағымдағы өндірісі есебінен толықтырылып отырады», – деді Энергетика министрлігінің ресми өкілі.
Ол бұған дейін елде мемлекеттік реттеу шаралары енгізілгенін және олардың күшінде екенін еске салды. Атап айтқанда, биылғы 21 қарашаға дейін мұнай өнімдерінің жекелеген түрлерін автомобиль және теміржол көлігімен экспорттауға уақытша шектеу қойылған.
«Бұдан бөлек, көлік құралдарының мемлекеттік шекараны тәулігіне бір реттен артық кесіп өтуіне шектеу енгізілген. 20 маусымнан бастап өткізу бекеттеріндегі бақылау күшейтілді. Бұл жұмысқа Ұлттық қауіпсіздік комитеті, Ішкі істер министрлігі, Мемлекеттік кірістер комитеті және Қаржылық мониторинг агенттігінің бөлімшелері тартылған. Ел ішіндегі жағдай да үкімет пен уәкілетті органдардың тұрақты бақылауында», – деді Әсел Серікбаева.
Жағдайды бақылау үшін әкімдіктер жанынан кәсіпкерлік басқармаларының қатысуымен өңірлік штабтар құрылған. Негізгі жұмысты Мемлекеттік кірістер департаменттері, Экономикалық тергеп-тексеру департаменттері және Бәсекелестікті қорғау және дамыту департаменттері атқаруда. Қазіргі уақытта олар жанармай құю бекеттеріндегі отын көлемін тексеріп, ЖЖМ-ды заңсыз әкету фактілерінің жолын кесіп, сатушылардың негізсіз әрекеттеріне ден қоюда.
«Бұл ретте Қазақстанда автомобиль отынының бөлшек сауда бағасы мемлекет тарапынан реттелмейтінін және тек нарықтық негізде қалыптасатынын атап өткен жөн», – деді министрдің кеңесшісі.
Еске салсақ, бұған дейін Reuters агенттігі дереккөздеріне сілтеме жасап, Ресейдің Қазақстаннан шамамен 50 мың тонна АИ-92 маркалы бензин импорттау мүмкіндігін талқылап жатқанын хабарлаған болатын. Агенттіктің мәліметінше, бұл қажеттілік Ресейдің кейбір мұнай өңдеу зауыттарының уақытша тоқтауы мен жоспардан тыс жөндеу жұмыстарына байланысты туындаған.
Энергетика министрі Ерлан Ақкенженов Қазақстанның Ресейге бензин жеткізу жөнінде келіссөз жүргізіп жатқаны туралы ақпаратты жоққа шығарды. Оның айтуынша, бүгінгі күнге дейін Ресей тарапынан министрлікке ресми сұраныс түспеген.
Ұлттық банк төрағасы Тимур Сүлейменов те Ресейдегі жанармай нарығындағы жағдай Қазақстанда мұқият бақылауда екенін, алайда оның ел экономикасына ықпалы жөнінде нақты болжам жасауға әлі ерте екенін мәлімдеген болатын.
Еске салайық, 2025 жылдың қазан айында Қазақстанда АИ-92 бензині мен дизель отыны бағасының өсуіне мораторий енгізілген еді. Ол 2026 жылғы 1 сәуірде өз күшін тоқтатты.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
