Алматыда су қорғау аймағындағы 17 жер телімі мемлекетке қайтарылды
Сот шешімімен Медеу ауданындағы жалпы аумағы 7,7 гектардан асатын учаскелер мемлекет меншігіне өтті
Алматыда Медеу ауданындағы Бекенбай өзенінің су қорғау аймағында орналасқан жалпы аумағы 7,7 гектардан асатын 17 жер телімі сот шешімімен мемлекет меншігіне қайтарылды, деп хабарлайды Kapital.kz іскерлік ақпарат орталығы қала әкімдігінің баспасөз қызметіне сілтеме жасап.
Тексеру барысында аталған жер телімдеріне қатысты жылжымайтын мүлік нысандарының кадастрлық паспорттарын рәсімдеу кезінде заңбұзушылықтар анықталған. Осыған байланысты қалалық Жер ресурстарын басқару департаменті 17 жер телімінің сәйкестендіру құжаттарын жою туралы нұсқама берген.
«Нұсқама талаптары орындалмағандықтан, департамент Алматы қаласының мамандандырылған ауданаралық экономикалық сотына талап арызбен жүгінді. Сот талапты толық көлемде қанағаттандырды. Сот шешімі заңды күшіне енгеннен кейін жер телімдері мемлекет меншігіне қайтарылды», – деп хабарлады әкімдікте.
Еске салсақ, бұған дейін Алматы әкімдігі Орталық мәдениет және демалыс саябағындағы жер телімдерін жалға алу шарттарын ұзартудан бас тартқан болатын. Бұған жалға алушының аумақты абаттандыру мен саябақ инфрақұрылымын дамытуға инвестиция салмағаны себеп болған. Қазір әкімдік саябақты көгалдандыруды, заманауи демалыс аймақтарын, туристік және мәдени инфрақұрылымды дамытуды көздейтін жаңғырту тұжырымдамасын әзірлеп жатыр.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
