Алматы облысының Қарасай ауданында жергілікті ауқымдағы ТЖ режимі енгізілді
Ақсай өзенінің жағалауын су шайып, карьердің солтүстік-батыс бөлігінде топырақ ығысты
Алматы облысының Қарасай ауданында жергілікті ауқымдағы төтенше жағдай режимі енгізілді, деп хабарлайды Kapital.kz іскерлік ақпарат орталығы облыс әкімдігінің баспасөз қызметіне сілтеме жасап.
«Бүгін, 2 шілде күні сағат 06:50 шамасында Қарасай ауданының Жанатұрмыс ауылындағы «Карьер Ақсай» ЖШС аумағында Ақсай өзенінің жағалауын су шайып, карьердің солтүстік-батыс бөлігінде топырақ ығысты. Оқиға орнына тиісті қызметтер жедел жіберілді. Қауіпсіздікті қамтамасыз ету мақсатында жақын маңдағы тоғыз жеке тұрғын үйдің тұрғындары уақытша қауіпсіз жерге көшірілді. Мамандар аумақты тексеріп, жағдайды тұрақтандыру үшін қажетті жұмыстарды жүргізіп жатыр», – делінген хабарламада.
Қазіргі уақытта инженерлік және қалпына келтіру жұмыстарының кешені жүргізілуде. Оған 19 қызметкер мен 14 техника жұмылдырылған. Сонымен қатар тұрғындармен түсіндіру жұмыстары жүргізіліп, олардың қауіпсіздігін қамтамасыз ету бойынша қажетті шаралар қабылдануда.
«Қалыптасқан жағдайға байланысты Қарасай ауданында жергілікті ауқымдағы төтенше жағдай жарияланды. Бұл шешім қажетті жұмыстарды жедел жүргізуге және жұмылдырылған қызметтердің іс-қимылын үйлестіруге мүмкіндік береді. Алматы облысының өзге аудандарындағы жағдай тұрақты. Жүргізіліп жатқан жұмыстар облыс әкімі мен тиісті мемлекеттік органдардың бақылауында», – деп хабарлады әкімдік.
Тұрғындарға сабыр сақтап, уәкілетті органдардың ұсынымдарын орындап, тек ресми ақпарат көздеріне сену ұсынылды.
Бұған дейін нөсер жауын салдарынан Түрген шатқалындағы Түрген өзенінің деңгейі күрт көтеріліп, Түрген – Ассы автожолының жекелеген учаскелерін су шайып кеткені белгілі болған еді. Су басу аймағында 17 киіз үй мен «Водник» бау-бақша қоғамындағы төрт аула қалған. Қауіпсіздік мақсатында ТЖМ құтқарушылары 58 адамды, оның ішінде 21 баланы және 8 шетел азаматын эвакуациялады. Зардап шеккендер жоқ.
Сондай-ақ Алматы қаласының қызметтері Төтенше жағдайлар департаментімен бірлесіп Ақсай өзені бассейніндегі жағдайды тәулік бойы бақылауды жалғастырып жатқаны хабарланған болатын. Алматының Наурызбай ауданындағы жағдай бақылауда, тұрғындарды эвакуациялау жүргізілген жоқ.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
