Үкімет биыл инфляцияны 10%-дан төмен деңгейде ұстап тұруды көздеп отыр
Бұл туралы премьер-министр Олжас Бектенов мәлімдеді
Премьер-министр Олжас Бектенов үкімет отырысында мемлекет басшысының парламент палаталарының қорытынды бірлескен отырысында берген тапсырмаларын іске асыру жөнінде министрлерге бірқатар тапсырма берді, деп хабарлайды Kapital.kz іскерлік ақпарат орталығы.
«Парламент палаталарының қорытынды бірлескен отырысында мемлекет басшысы барлық реформалардың басты мақсаты – халықтың әл-ауқатын арттыру екенін атап өтті. Тұрақты экономикалық өсудің маңызды факторларының бірі – биыл инфляция деңгейін 10%-дан төмен ұстап тұру. Бұған қажетті барлық құрал бар. Қабылданатын барлық шара Ұлттық банкпен үйлестірілуі тиіс», – деді үкімет басшысы.
Ол мемлекеттік органдардың бірінші басшыларына Макроэкономикалық тұрақтандыру жөніндегі бірлескен іс-қимыл бағдарламасы мен инфляцияны бақылау және төмендету жөніндегі іс-шаралар кешенінің сапалы орындалуын қатаң бақылауға алуды тапсырды.
«Отандық өндірісті қолдау, нарықты тауарлармен толықтыру, сақтау және логистика инфрақұрылымын дамыту, баға белгілеуді реттеу, сондай-ақ "Инвестицияға тапсырыс" құралын толыққанды іске асыру жұмыстарын жалғастыру қажет. Сонымен қатар Ұлттық экономика министрлігі мүдделі мемлекеттік органдармен бірлесіп тұтынушылар мен табиғи монополия субъектілерінің мүдделерін ескере отырып, теңгерімді тарифтік саясатты қамтамасыз етуі керек», – деді премьер-министр.
Екінші тапсырма «Энергетика және коммуналдық секторларды жаңғырту» ұлттық жобасын іске асыруға қатысты болды. Биылдың соңына дейін шамамен 12 мың шақырым инженерлік желіні жөндеу жоспарланып отыр.
Өнеркәсіп және құрылыс министрлігіне мемлекеттік сатып алуда отандық өндірушілердің тауарлары, жұмыстары мен қызметтеріне басымдық беру арқылы олардың өндірістік қуатын арттыруға жағдай жасау тапсырылды.
«Мемлекет басшысы атап өткендей, құрылыс көлемін сақтап қана қоймай, оны ұлғайту қажет. Осыған байланысты Өнеркәсіп және құрылыс министрлігіне өңір әкімдіктерімен бірлесіп жоспарланған тұрғын үй көлемін пайдалануға беруді қамтамасыз етуді тапсырамын. Инженерлік инфрақұрылымды уақытылы жеткізу мен құрылыс жұмыстарының сапасы ерекше бақылауда болуы тиіс», – деді Олжас Бектенов.
Оның айтуынша, биыл өңдеу өнеркәсібінде шамамен 200 жаңа жобаны іске қосу жоспарланып отыр. Сондықтан мәлімделген инвестиция көлемін тарту мен озық технологияларды енгізуді қамтамасыз ету қажет.
«Өнеркәсіп және құрылыс министрлігі Ұлттық экономика министрлігімен және өңір әкімдіктерімен бірлесіп әрбір жобаны ерекше бақылауда ұстауы тиіс», – деп тапсырды премьер-министр.
Үкімет басшысы мемлекет басшысы фармацевтика саласының тұрақты өсімін ерекше атап өткенін еске салып, бұл қарқынды сақтап, саланың одан әрі дамуын қамтамасыз ету маңызды екенін айтты.
Осыған байланысты Денсаулық сақтау министрлігіне әкімдіктермен бірлесіп отандық дәрілік заттар мен медициналық бұйымдардың үлесін арттыруға бағытталған ірі инвестициялық жобаларды уақытылы іске асыру тапсырылды.
«Үкімет агроөнеркәсіп кешенін мемлекеттік қолдау шараларын одан әрі дәйекті түрде күшейте береді. Ауылдық жерлерде жыл бойы жұмыспен қамтуды қамтамасыз ету мақсатында әкімдіктерге ірі шаруашылықтармен өзара іс-қимылды жандандыруды тапсырамын. Мал шаруашылығын дамытуға ерекше назар аударып, бөлінген қаражаттың мақсатты пайдаланылуын бақылау қажет», – деді премьер-министр.
Сондай-ақ ол мемлекет басшысының елді газдандыру деңгейін 80%-ға дейін жеткізу жөніндегі тапсырмасын еске салды.
«Энергетика министрлігіне QazaqGaz ұлттық компаниясымен және облыс әкімдіктерімен бірлесіп бір ай мерзімде газ тарату желілерін кеңейту және салу жоспарларын өзектендіруді тапсырамын. Бұл жобаларды толық әрі үздіксіз қаржыландыруды қамтамасыз етіп, оларды іске асыру мерзімдерін қатаң бақылауға алу қажет. Жақын арада үкімет отырысында газ саласын дамыту мәселесін жеке қараймыз», – деді Олжас Бектенов.
Сонымен қатар мемлекет басшысы авиациялық отынмен қамтамасыз ету инфрақұрылымын құру міндетін қойғанын айтты. Осыған байланысты Энергетика министрлігіне Көлік министрлігімен және «Самұрық-Қазына» қорымен бірлесіп авиациялық отынды сақтау және тарату нысандарын жаңғырту мен салудың егжей-тегжейлі жоспарын қысқа мерзімде әзірлеу тапсырылды. Оның айтуынша, бұл жұмыс қарқынды дамып келе жатқан авиация саласының қажеттіліктерін толық қамтамасыз ету үшін алдын ала жүргізілуі тиіс.
«Президент Көкшетау, Семей және Өскемен қалаларындағы үш көмір электр станциясының құрылысы созылып кеткеніне орынды сын айтты. Осыған байланысты Энергетика министрлігіне "Самұрық-Қазына" қорымен, Атом энергиясы агенттігімен және басқа да мемлекеттік органдармен бірлесіп генерация саласындағы жобалардың белгіленген мерзімде іске асырылуын қамтамасыз етуді тапсырамын», – деді үкімет басшысы.
Президент Қазақстанды өңірдегі жетекші көлік-логистикалық хабтардың біріне айналдыру міндетін қойғанын атап өткен Олжас Бектенов көлік саласында жаңа теміржол желілерінің құрылысы мен вокзалдарды жаңғырту жобаларын аяқтау қажет екенін айтты.
Сонымен қатар «Қарағанды–Жезқазған» республикалық автожолын қайта жаңғырту басталды. Бұл жоба жолдың өткізу қабілетін арттырып, өңірлердің байланысын күшейтеді. Сондай-ақ «Бейнеу–Сексеуіл» және «Орталық–Батыс» автожолдарының сапалы әрі уақытында салынуын қамтамасыз ету қажет. Ал келесі жылы автомобиль өткізу бекеттерін жаңғырту жұмыстарын аяқтау жоспарланып отыр.
«Сондай-ақ президент жаңа елордалық әуежай құрылысын мүмкіндігінше тезірек бастауды тапсырды. Астана әкімдігіне осы жобаны қысқа мерзімде іске асыруға кірісуді тапсырамын. Үкімет тарапынан барлық қажетті қолдау көрсетіледі», – деді премьер-министр.
Ол Жасанды интеллект министрлігіне «Қазақтелеком» компаниясымен бірлесіп «Деректерді өңдеу орталықтары алқабы» жобасына шетелдік капитал тарту қарқынын күшейтуді тапсырды.
Сонымен қатар президент жасанды интеллект жобаларын цифрлық сүйемелдеуді және дамытуды қамтамасыз ететін кадрлар даярлау мәселесіне ерекше назар аударғанын айтты. Биыл бұл бағыттағы негізгі орталықтардың бірі Qazaq AI Research University болады. Осыған байланысты Ғылым және жоғары білім министрлігі мен Жасанды интеллект министрлігіне аталған мәселені ерекше бақылауда ұстау тапсырылды.
«Шағын және орта бизнесті дамыту экономиканың тұрақты өсуі мен халықты жұмыспен қамтуды қамтамасыз етеді. Біз реттеушілік кедергілерді азайту арқылы қолайлы бизнес ортаны одан әрі қалыптастыруымыз қажет. Бизнестің мүмкіндіктерін кеңейту мақсатында қолдаудың жаңа цифрлық құралдарын әзірлеу талап етіледі. Экспорттық әлеуеті бар жоғары технологиялық өнім шығаратын кәсіпорындарға басымдық берілуі тиіс. Ұлттық экономика министрлігіне салалық мемлекеттік органдармен және «Атамекен» Ұлттық кәсіпкерлер палатасымен бірлесіп тиісті шаралар қабылдауды тапсырамын», – деді премьер-министр.
Оның айтуынша, мемлекет басшысы елдің инвестициялық ахуалын одан әрі жақсарту және экономиканың басым секторларында қосылған құнды арттыратын серпінді жобаларды іске асыру міндетін қойған.
«Осы тұрғыда әрбір министр мен әкімнің алдына инвестиция тарту бойынша нақты индикаторлар мен міндеттер қойылғанын атап өтемін. Биыл біз 25,5 млрд доллардан астам тікелей шетелдік инвестиция және негізгі капиталға 31,5 трлн теңге инвестиция тартуымыз қажет. Осыған байланысты Сыртқы істер министрлігіне және мүдделі мемлекеттік органдарға жоспарлы көрсеткіштерге қол жеткізу үшін бұл бағыттағы жұмысты күшейтуді тапсырамын. Сыртқы істер министрлігі Бас прокуратурамен бірлесіп барлық жобаларды сүйемелдеу және инвесторлардың заңды құқықтарын қорғау жұмысын жүйелеуі тиіс», – деп атап өтті Үкімет басшысы.
Жаңа Конституцияда мемлекет басшысының «Таза Қазақстан» бастамасының негізгі қағидаттары бекітілді. Бұл бастама жалпыұлттық ауқымды қозғалысқа және қоғам мәдениетінің бір бөлігіне айналды. Барлық мемлекеттік органдар аумақтарды абаттандыру мен көгалдандыру, қоғамның экологиялық мәдениетін арттыру жөніндегі жұмысты күшейтуі қажет. Осыған байланысты бұл қозғалысқа жастар ұйымдарын, волонтерлік топтарды, өңірлердің еңбек ұжымдарын және мемлекеттік органдарды кеңінен тарту қажет.
«Жаңа Конституцияның негізгі қағидаттарының бірі – «Заң және тәртіп». Оны іске асыру заңдылықты нығайтуды, қоғамдық қауіпсіздікті қамтамасыз етуді және құқық бұзушылықтарға «мүлдем төзбеушілік» қағидатын көздейді. Ең алдымен құқық бұзушылықтардың алдын алу мәселелеріне басымдық беру қажет. Бұл ретте «Заң және тәртіп» конституциялық қағидатын іске асыру жөніндегі ведомствоаралық комиссияның барлық әлеуетін пайдалану керек. Ішкі істер министрлігіне Комиссияның жұмыс жоспарын өзектендіруді тапсырамын», – деді Олжас Бектенов.
Мемлекет басшысы атап өткендей, әлеуметтік сала теңгерімді әрі барынша тиімді болуы тиіс. Жалпы елімізде әлеуметтік көмектің көпдеңгейлі әрі атаулы жүйесі қалыптастырылған. Бұл көмек шынымен мұқтаж азаматтарға бағытталуы керек. Мемлекеттің барлық базалық әлеуметтік кепілдіктері сақталады. Еңбек және халықты әлеуметтік қорғау министрлігіне цифрлық құралдарды пайдалана отырып жүйелі жұмысты жалғастыру тапсырылды.
«Әріптестер! Жаңа Конституция ережелерін практикалық іске асырудың ең жауапты кезеңі басталады. Барлық мемлекеттік органдардың үйлесімді жұмысына жаңа конституциялық нормалардың тиімді орындалуы, заң үстемдігі қағидаттарының нығаюы және азаматтардың конституциялық құқықтары мен бостандықтарының қамтамасыз етілуі байланысты. Жалпыұлттық референдумнан кейінгі өткен айларда жаңа мемлекеттік институттардың қызметі, Құрылтай сайлауын өткізу және негізгі конституциялық реформаларды жүзеге асыру үшін қажетті құқықтық негіз қалыптастырылды. Алайда бұл – ауқымды жұмыстың бастамасы ғана. Алда бірқатар заңға тәуелді құқықтық актілерді қабылдау, салалық заңнаманы кешенді түрде қайта қарау және бүкіл құқықтық жүйені жаңа Конституцияға сәйкестендіру міндеті тұр. Осыған байланысты Әділет министрлігіне үйлестіруді қамтамасыз етіп, қолданыстағы заңнаманы жетілдіру жөніндегі жұмысты жалғастыруды тапсырамын», – деді Үкімет басшысы.
Ол жаңа Конституцияда адами капиталды, білім беруді, ғылым мен инновацияны дамыту мемлекеттің стратегиялық қызмет бағыты ретінде айқындалғанын атап өтті. Жауапты азамат тәрбиелеу – білім мен ғылым саласының негізгі міндеттерінің бірі. Оның айтуынша, жас ұрпақтың құндылықтары мен дүниетанымын қалыптастыруға бағытталған жүйелі мемлекеттік саясат жүргізілуі қажет.
Оқу-ағарту министрлігі мен Ғылым және жоғары білім министрлігіне оқушылардың конституциялық-құқықтық мәдениетін, құқықтық сауаттылығын және азаматтық жауапкершілігін қалыптастыру бойынша тұрақты жұмысты ұйымдастыру тапсырылды.
«Жаңа Конституцияны, заң үстемдігі қағидаттарын және адам құқықтарын құрметтеуді зерделеуге бағытталған заманауи білім беру және тәрбие тәсілдерін енгізуді қамтамасыз ету қажет. Біз тек бәсекеге қабілетті маманды ғана емес, сонымен қатар еліміздің болашағы үшін жеке жауапкершілігін сезінетін азаматты тәрбиелеуге тиіспіз. Әрбір жауапты басшы жаңа Конституцияны іске асыру және Әділетті, Қуатты, Қауіпсіз, Таза әрі Озық Қазақстанды құру жолында барлық қажетті күш-жігерін салады деп сенемін», – деп түйіндеді Олжас Бектенов.
Премьер-министрдің орынбасары – ұлттық экономика министрі Серік Жұманғарин бүгін үкімет жыл қорытындысы бойынша экономиканың өсімі кемінде 5% болады деп күтетінін мәлімдеді. Министрлер кабинетінің басым бағыттарының бірі халықтың нақты табысын 2-3%-дан жоғары деңгейге жеткізу және азаматтардың кредиттік жүктемесін азайту болып қала береді.
Айта кетейік, бүгін Қазақстанда жаңа Конституция күшіне енді. Осыған орай мемлекет басшысы Қасым-Жомарт Тоқаев қазақстандықтарға үндеу жасады.
2026 жылғы 15 наурызда Қазақстанда жалпыұлттық референдум өтіп, оның қорытындысы бойынша елдің жаңа Конституциясы қабылданды.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
