Семейдің жылу желілерін жөндеуге 2,5 млрд теңге бөлінді
Қаланың жылу желілерінің 58%-ы тозған
Үкімет Абай облысының жылу желілерін жылыту маусымына дайындауға 2,5 млрд теңге бөлді. Тиісті қаулыға Премьер-министр Олжас Бектенов қол қойды, деп хабарлайды Kapital.kz іскерлік ақпарат орталығы.
Қаражат алдағы жылыту маусымының тұрақты өтуін қамтамасыз ету үшін Семей қаласындағы жылумен қамту нысандарын жөндеуге бағытталады.
Бүгінде Семей қаласында 340 мыңға жуық халық тұрады. Орталықтандырылған жылумен жабдықтау жүйесі 70 мыңнан астам тұтынушыны, соның ішінде көпқабатты және жеке тұрғын үйлерді, сондай-ақ әлеуметтік инфрақұрылым нысандарын жылумен қамтамасыз етеді.
Қаладағы сыртқы жылу желілерінің жалпы ұзындығы – 325,5 шақырым. Желілердің тозу деңгейі 58,2% немесе 189 шақырым, бұл инфрақұрылымды кезең-кезеңімен жөндеу және жаңғырту жұмыстарын жалғастыру қажет екенін көрсетеді.
«Кейінгі жылдары қалада 54 шақырым жылу желілілерін ауыстыру, күрделі жөндеу, реконструкциялау жұмыстары жүргізілді. Нәтижесінде тозу деңгейі 75%-дан 58%-ға дейін төмендеді», делінген Үкіметтің баспасөз қызметі таратқан ақпаратта
2025–2026 жылдардағы жылыту маусымына дайындық аясында Семей қаласындағы жылумен қамту нысандарында бірінші кезектегі жөндеу жұмыстары жүргізілді. Бұл ретте қажетті қаржыландырудың 70%-ы Үкімет резерві есебінен қамтамасыз етілді.
Бөлінген қаржы 2026–2027 жылдардағы жылыту маусымына дайындық шеңберінде жылу желілерінің ең маңызды учаскелерін жаңартуды жалғастыруға мүмкіндік береді.
Еске салсақ, бұған дейін Талдықорғанның жылумен жабдықтау жүйесін дамытуға 5,7 млрд теңге бөлінгені хабарланды, Қазақстандағы бес проблемалық ЖЭО «сары» аймаққа өтті. Премьер жылу нысандарын жөндеуді тамыздың соңына дейін аяқтауды тапсырған болатын.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
