Қазақстанда шегірткеге қарсы 1,3 млн гектар ауыл шаруашылығы алқабы өңделді
Бұл – 2026 жылға жоспарланған жалпы жұмыстың 62 пайызы
Ауыл шаруашылығы министрлігі егістік пен жайылымдарды зиянкестерден қорғау жұмыстарын жалғастырып жатыр, деп хабарлайды Primeminister.kz.
Ведомство мәліметінше, бүгінгі таңда 1,3 млн гектар аумақта химиялық өңдеу аяқталды. Бұл – биылға болжанған жалпы көлемнің 62 пайызы.
Қорғау шаралары фитосанитарлық мониторинг нәтижесіне сүйене отырып жүргізіледі. Шегіртке тек ошақтары анықталып, олардың зиян келтіру деңгейі экономикалық шекке жеткенде өңделеді. Бұл қабылданып жатқан шаралардың тиімділігін арттырып, бюджет қаражатын үнемдеуге мүмкіндік береді.
Қазіргі уақытта алқаптарды зерттеу жұмыстары бүкіл ел бойынша жүріп жатыр. Мониторинг пен қорғау шараларына 3,5 мыңға жуық маман тартылған. Барлық аймақ пестицидтердің жеткілікті қорымен және қажетті техникамен қамтамасыз етілген.
Зерттеу мен залалсыздандыру жұмыстарына әуе кемелері, 103 ұшқышсыз ұшу аппараты және арнайы жерүсті техникасы қолданылуда. Қорғау шараларына жалпы саны 556 техника жұмылдырылды. Бұл зиянкестердің ошақтарына жедел әрекет етуге және қорғау жұмыстарын уақытылы жүргізуге септігін тигізеді.
Қазіргі таңда елдегі фитосанитарлық жағдай тұрақты әрі бақылауда. Шегірткенің жаппай таралу қаупі барынша азайтылды, мониторинг және қорғау шаралары жоспарлы режимде жалғасуда.
Атқарылған жұмыстар өз нәтижесін берді: 2025 жылдан бастап өңделетін аумақ көлемі азайғаны байқалады. Мәселен, өткен жылы 2,7 млн гектар жер қамтылды, бұл 2024 жылғы көрсеткіштен 13 пайызға аз. Биыл болжамды алқап көлемі 2,2 млн гектарды құрайды, бұл 2024 жылмен салыстырғанда 30 пайызға кем. Зиянкестер санының азаюына өсімдіктерді қорғау қызметін жетілдіру бойынша қабылданған шаралар айтарлықтай үлес қосты.
Жүйелі іс-шаралардың нәтижесінде ауыл шаруашылығы алқаптарының бүлінуіне жол берілмеді. Қорғау жұмыстары үстіміздегі жылдың 20 шілдесінде аяқталады.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
