Премьер жылу нысандарын жөндеуді тамыздың соңына дейін аяқтауды тапсырды
Төрт өңірдегі жылу көздері мен инфрақұрылымға 25 млрд теңге бөлінеді
Премьер-министр Олжас Бектенов өткен жылыту маусымының қорытындысын шығарып, оның жалпы алғанда елеулі іркілістерсіз өткенін атап өтті. Оның айтуынша, критикалық апаттардың алдын алуға мүмкіндік болған, ал электр станцияларындағы технологиялық бұзушылықтар өткен жылмен салыстырғанда 15%-ға азайған, деп хабарлайды Kapital.kz іскерлік ақпарат орталығының тілшісі.
Сонымен қатар, үкімет 2026 жылы инфрақұрылымды ауқымды жаңғыртуға басымдық беріп отыр. Жоспар бойынша 130 шақырым жылу желісі және 10,5 мың шақырым электр желісі жаңартылады. Нәтижесінде тозу деңгейін жылу желілерінде 48%-ға, электрмен жабдықтауда 62%-ға дейін төмендету көзделген.
«Энергия көздері мен желілердегі жабдықтарды жөндеу және ауыстыру жұмыстарын жүйелі түрде жалғастыру қажет. Жылу желілеріне уақтылы және сапалы сынақтар жүргізу керек. Уақытты созуға болмайды. Барлық жұмыс белгіленген мерзімде және толық көлемде орындалуы тиіс. Жазғы кезеңде күшейтілген режимде жұмыс істеу қажет», – деді премьер үкімет отырысында.
Қосымша ретінде үкімет резервінен 25 млрд теңгеден астам қаражат бөлінеді. Бұл қаржы Жетісу, Абай, Ақмола және Шығыс Қазақстан облыстарындағы жылу көздерін салу және жөндеуге, сондай-ақ төрт өңірде шамамен 30 шақырым жылу желісін жаңартуға бағытталады.
Қаржы бөлінгеніне қарамастан, кей өңірлерде жұмыстардың кешігу қаупі бар. Осыған байланысты Олжас Бектенов мерзімдерді сақтау бойынша әкімдердің жеке жауапкершілігін атап өтті.
«Өңір әкімдіктері екі апта ішінде барлық конкурс рәсімдерін өткізіп, жөндеу жұмыстарына кірісуі тиіс. Мұнда артық бюрократия болмауы керек. Жылу нысандарын жөндеу тамыз айының соңына дейін толық аяқталуы қажет. Өнеркәсіп және құрылыс министрлігі мен әкімдіктер 1 қыркүйекке дейін білім беру және денсаулық сақтау нысандарының толық дайындығын қамтамасыз етсін», – деді Олжас Бектенов.
Айта кетейік, бұған дейін Қазақстанда бес проблемалы ЖЭО «сары» аймаққа ауыстырылған болатын.
Сондай-ақ үкімет Талдықорғанда жылу нысандарын аяқтауға 5,7 млрд теңге бөлсе, Риддердегі жылу желілері мен ЖЭО-ны жөндеуге 1,8 млрд теңге бағытталған. Қазақстандағы ЖЭО-лардың жалпы тозу деңгейі 59%-ды құрайды.
Наурыз айында көмір генерациясын дамыту жөніндегі ұлттық жоба бекітіліп, жаңа станциялар салу мен қолданыстағыларды жаңғыртуға 7,5 трлн теңге инвестиция қажет екені айтылған. Ұлттық құрылтайда Қасым-Жомарт Тоқаев Қазақстанда шамамен 33 млрд тонна көмір қоры бар екенін атап өтіп, көмір генерациясына ұлттық жоба мәртебесін беруді тапсырған еді.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
