Талдықорғанның жылумен жабдықтау жүйесін дамытуға 5,7 млрд теңге бөлінді
Қаражат қазандық пен жылу желілерін салу жобаларын аяқтауға бағытталады
Мемлекет басшысы Қасым-Жомарт Тоқаевтың халықты сенімді жылумен қамтамасыз ету жөніндегі тапсырмаларын орындау аясында үкімет Жетісу облысының Талдықорған қаласындағы жылумен жабдықтау нысандарының құрылысын аяқтауға шамамен 5,7 млрд теңге бөлді. Тиісті қаулыға премьер-министр Олжас Бектенов қол қойды, деп хабарлайды Primeminister.kz.
Қаражат қаланың жаңа Оңтүстік-Батыс тұрғын ауданында қазандық пен жылу желілерін салу жобаларын аяқтауға бағытталады.
Жобаларды іске асыру Болашақ, Көктем, Бірлік және Құлагер шағынаудандарындағы жаңа тұрғын үйлер мен әлеуметтік нысандарды тұрақты жылумен қамтамасыз етуге мүмкіндік береді.
Қазіргі таңда Талдықорғанның орталықтандырылған жылумен жабдықтау жүйесіне жалпы қуаты 400 Гкал/сағ болатын 10 қазандық және 179 км жылу желісі кіреді. Облыс орталығы халқы санының жыл сайын артуы мен жылу жүктемесінің өсуін ескере отырып, жылумен жабдықтау инфрақұрылымын одан әрі дамыту қажет.
Қолданыстағы қуаттарды жеңілдету және жылумен жабдықтаудың сенімділігін арттыру мақсатында қалада қуаты 49 Гкал/сағ болатын жаңа қазандықтың құрылысы жүргізілуде. Жобаның құны 11,1 млрд теңгені құрайды. Қазіргі уақытта нысанның құрылыс дайындығы шамамен 60%-ды құрайды. Жұмыстарды аяқтау осы жылдың қыркүйек айына жоспарланған.
Сонымен қатар жаңа қазандықтың толыққанды жұмыс істеуі үшін қажет Оңтүстік-Батыс тұрғын ауданындағы жылу желілерін салу жобасы қатар жүзеге асырылуда. Оны аяқтау да осы жылдың күзіне жоспарланған.
Нысандар пайдалануға берілгеннен кейін 2024-2026 жылдары салынған 120 көпқабатты тұрғын үй мен 17 әлеуметтік, коммерциялық және өзге де нысан жылумен қамтамасыз етіледі. Жаңа шағынаудандардағы тұтынушылардың жалпы саны шамамен 20 мың адамды құрайды.
Жобаларды іске асыру Талдықорғанның жаңа аудандары үшін қажетті жылу қуатының резервін қалыптастыруға, қолданыстағы инфрақұрылымға түсетін жүктемені азайтуға және алдағы жылыту маусымдарында қаланың жылумен жабдықтау сенімділігін арттыруға мүмкіндік береді.
Бұған дейін Риддер қаласындағы жылу желілері мен ЖЭО-ны жөндеуге 1,8 млрд теңге бағытталатыны хабарланған болатын.
Сондай-ақ Қазақстандағы ЖЭО-лардың жалпы тозу деңгейі 59%-ды құрайтыны айтылған еді.
Биылғы наурыз айында көмір генерациясын дамыту жөніндегі ұлттық жоба бекітілді. Жаңа станциялар салу және қолданыстағыларды жаңғырту үшін 7,5 трлн теңге инвестиция қажет болады. Ұлттық құрылтайдың V отырысында Қасым-Жомарт Тоқаев Қазақстанда көмір қоры аса мол екенін – шамамен 33 млрд тонна екенін еске салды. Ол көмір генерациясын дамыту жұмыстарын ұлттық жоба мәртебесіне ие етуді тапсырды.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
