Қазақстанда 32 гидротехникалық нысанда шағын СЭС салынады
Қазіргі уақытта үш станцияның жобалау-сметалық құжаттамасы әзірленіп жатыр
«Қазсушар» РМК-ның 32 су шаруашылығы нысанында шағын СЭС салынады, деп хабарлайды Kapital.kz іскерлік ақпарат орталығы Су ресурстары және ирригация министрлігінің баспасөз қызметіне сілтеме жасап.
Министрліктің мәліметінше, «Қазсушар» РМК бекіткен Су шаруашылығы құрылыстарындағы шағын гидроэнергетика әлеуетін арттыру жөніндегі жол картасы аясында кәсіпорын шағын СЭС салу үшін 32 нысанды іріктеп алған. Бүгінде Қарағанды облысындағы Самарқанд, Ақтөбе облысындағы Қарғалы және Абай облысындағы Қаракөл су қоймаларында шағын гидроэлектрстанцияларын салуға арналған жобалау-сметалық құжаттама әзірленіп жатыр.
Сонымен қатар кәсіпорын тағы 23 жоба бойынша құжаттама дайындау үшін есеп-қисап жұмыстарын жүргізуде. Жол картасы аясында Қостанай облысындағы Қаратомар және Жоғарғы Тобыл су қоймалары, Жетісу облысындағы «Аяқ-Күнчан» және Түркістан облысындағы Үлкен Келес магистральдық каналдары басымдыққа ие нысандар ретінде белгіленді.
Ал Еңбекшіқазақ ауданындағы Үлкен Алматы каналының транзиттік учаскелерінде шағын СЭС орнату үшін «Қазсушар» РМК жеке инвестормен меморандумға қол қойды.
«Барлық жоба іске асқаннан кейін, «Қазсушар» нысандарында өндірілетін электр энергиясының жалпы қуаты жылына 30 МВт құрайды. Кәсіпорын балансында қазірдің өзінде үш шағын СЭС бар: олар Солтүстік Қазақстан облысындағы Сергеев гидроторабында, Қарағанды облысындағы Ынтымақ су қоймасында және Қорғас өзеніндегі «Достық» гидроторабында орналасқан», — деді Су ресурстары және ирригация министрі Нұржан Нұржігітов.
Бұған дейін жыл соңына дейін Қазақстандағы 105 гидротехникалық құрылысқа көпфакторлы зерттеу жүргізу жоспарланғаны хабарланған болатын. Сондай-ақ елімізде құрылысы ұзаққа созылған 10 гидротехникалық нысанның жұмысын қайта жандандырып, аяқтау көзделіп отыр.
Одан бөлек, каналдарды, су қоймалары мен гидротораптарды қайта жаңғырту жоспары мәлімделді. Бұдан бұрын 2026 жылы елде топтық су құбырларын жаңғырту бойынша 12 жоба іске асырылып, бұл мақсатқа 70,2 млрд теңге көлемінде қаржы бөлінетіні айтылған еді.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
