• Басты бет
• Экономика
• 1 шілдеден бастап Қазақстанда газдың көтерме бағасы 33%-ға өседі – Энергетика министрлігі

1 шілдеден бастап Қазақстанда газдың көтерме бағасы 33%-ға өседі – Энергетика министрлігі

Энергетика министрлігі көтерме бағаның өсуін газ инфрақұрылымын жаңарту қажеттілігімен және жылыту маусымына дайындықпен түсіндірді

Қазақстанда 2026 жылғы 1 шілдеден бастап тауарлық газдың көтерме бағасын орташа есеппен 33%-ға көтеру жоспарланып отыр. Бұл ретте Энергетика министрлігі халық үшін тарифтердің күрт қымбаттамайтынын және бағаның өсуі тежелетінін мәлімдеді. Бұл туралы Орталық коммуникациялар қызметінде өткен брифингте ҚР Энергетика вице-министрі Қайырхан Тұтқышбаев айтты, деп хабарлайды Kapital.kz іскерлік ақпарат орталығының тілшісі.

«Энергетика министрлігі биылңы жылдың 1 шілдесінен бастап газдың көтерме бағасын көтеру туралы шешім қабылдады. Мұнда тек көтерме бағалар туралы сөз болып отырғанына назар аударғым келеді: олар өңірлер бойынша саралана отырып, орташа есеппен 33%-ға артады», — деді вице-министр.

Оның айтуынша, бұл шаралар саланың инвестициялық тартымдылығын арттыруға, сондай-ақ газ инфрақұрылымын уақтылы жаңғыртуды қамтамасыз етуге және күзгі-қысқы маусымға дайындыққа бағытталған.

«Сонымен қатар, халық арасында газды үнемдеп тұтыну мәдениетін қалыптастыру маңызды. Бағаның өсуі инфляциялық процестерді ескере отырып, индекстеу қажеттілігімен де байланысты. Онсыз саланың бұдан әрі дамуы мүмкін емес», – деп атап өтті ол.

Сондай-ақ ол көтерме бағаның өсуіне қарамастан, халық үшін тарифтердің күрт өсуі күтілмейтінін жеткізді.

Бұдан бөлек, вице-министр энергия өндіруші ұйымдардың газ операторы алдындағы 37,7 млрд теңге көлеміндегі қарызына қатысты пікір білдірді.

«Энергия өндіруші ұйымдардың «Қазақгаз» алдындағы қарызына келетін болсақ, бұл мәселеден толық хабардармыз. Біз ұлттық компаниямен де, энергия өндірушілермен де тұрақты байланыстамыз. Негізгі міндет – халықты жарықсыз қалдырмау және шектеулерге жол бермеу. Қарыз мәселесі, соның ішінде тариф саясатын қайта қарау мүмкіндігі арқылы қарастырылып жатыр, алайда жақын арада бұл халыққа әсер етпейді», – деді ол.

Бұған дейін 2026 жылы Астананың барлық тұрғын алаптарын газбен қамтамасыз ету жоспарланғаны хабарланған болатын. 2019 жылы елордаға «Сарыарқа» газ құбыры тартылып, қазір ол арқылы көгілдір отын жеткізіліп жатыр.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Сізге қызықты болуы мүмкін

Kapital.kz-ті оқыңыз